رَسانک نیوز/ چارشمبے بیگاه ءَ 14 ھُرداد ماه 1404 ءَ، دُزاپ ءِ انکلاب 7 روڈ ءَ سواری گاڑئے بے پجّاریں نندوکان ءَ 13 سالگیں بلوچیں زھگے کہ آئی ءِ نام «ابوبکر شہ بکش» زانگ بوتگ، ھماں وھد ءَ آوار جتگ کہ آئی سینکل ءَ سوار بوتگ.
چہ دور گندانی شنگ بوتگیں ویڈیو ءَ، جاه اَتکگ کہ آوار جنوکاں وتی گاڑی داشتگ ءُ تُرندی سرا ایر کپتگ اَنت ءُ اے زھگ ءَ زور ءِ سرا وتی گاڑی ءَ سوار کرتگ ءُ بُرتگ. ویڈیو رکاڈے بوھگ ءَ ھم، پلیس ءُ امنیتی باسک ءَ پہ آوار جنوکان ءِ پجّارگ ءُ زانگ ءَ یا کہ آیانی دزگیر کنگ ءَ ھچ پیمیں گام گیجی نہ کرتگ.
ویڈیوئے رِد ءَ، اے ویل ماں ساھت 19:48 ءَ پیش آتکگ، چہ آں روچ ءَ بگر داں کہ مروچی ابوبکر ءِ ھال سرپدئے دست نہ کپتگ ءُ آئی ءِ مات، چہ چُک ءِ بیگواہ بوھگ ءِ گماں سکّ ءَ ناجوڑ اِنت ءُ ماں دُزاپ ءِ امام الی نادراهجاه ءَ تھت ءِ باھوٹ اِنت.
اے ویل ءُ بلوچستان ءِ چار کُنڈ ءُ دمگاں، چہ پیسرا ٹاھینتگیں جھمنندانی آوار جنگ اُدے مھلوک ءِ دل پریشانی گیش کرتگ. بلوچستان ءَ آوار جنگ ءِ ویل ءُ واکان ءَ اگاں شرّئے سرا پٹ ءُ پول بکنیں، گڑا اے ھبر درا بیت کہ آیانی تہا لہتیں وڈ ءُ داب یک اَنت، چُش کہ آوار جنوکان ءَ وتی دیم بستگ ءُ نکاب جتگ، بے نمبر پلیٹ گاڑئے کار مرز کنگ، روچے روژن ءَ مہلوک ءِ آوار جنگ، رشّ ءُ بیڑے وھداں مردمانی آوار جنگ، اے پیش داریت کہ تمامیں آوار جنگ ءِ ویل ءُ واکاں چہ یکّیں بُندر ءَ چِست بنت ءُ آیانی بُن ءُ مستر یکیں.
امنیتی باسک ءُ انساپ دیوکیں زمہ وارانی اے باروا وتی دپ ءِ دارگ ءُ ھچ ءِ نہ گوشگ، بلوچستان ءِ جھمنندانی دل پریشانی گیش کرتگ.
Be the first to comment