واش ءَ بے پجّارین ءُ سلاہ بندیں مردمانی تیرگواری ءَ بلوچے ٹپیگ بوتگ

رَسانک نیوز/ چارشمبے روچ 14 ھُرداد ماه 1404 ءَ، واش ءِ آمیدگس ءِ دیم ءَ بے پجّارین ءُ سلاہ بندیں مردمانی تیرگواری ءَ بلوچے ٹپیگ بوتگ.

ٹپیگ بوتگیں بلوچے پَجّار داں اے ساھت ءَ زانگ نہ بوتگ، بلے گوشنت کہ چہ شهنوازی کٹھمدان ءَ بوتگ ءُ تیر ورگ ءَ پد، آئی ءِ ھالت سکّ ءَ ھراب اِنت.

اے ویل ءَ پیش ھم، بے پجّارین ءُ سلاہ بندیں مردمان ءَ واش ءِ بازار ءَ «ادنان گنگوزهی»، 19 سالگ، ایوب ءِ چُک ءِ سرا تیرگواری کرتگ ءُ کُشتگ.

جنوکان ءِ پجّار ءُ آیانی سوب چہ اے کار ءَ داں اے ساھت ءَ زانگ نہ بوتگ.

ھنّیگیں روچاں، بد امنی ماں واش ءَ پہ آھریں ھّدا رستگ، مردمانی آوار جنگ، تیرگواری، سلاہ بندیں مردمانی دست ءَ جھمنندانی پُلَگ بوھگ، روڈ ءُ راھانی سرا اَڑ ءُ جیڑھے ویل ءُ واکان ءَ اُدے نندوکان ءِ زندمان سکّ ءَ سہت کرتگ. ھر روچیں ویل ءُ واکانی سوب ءِ پٹ ءُ پول ءَ اے گپّ الّم کرتگ کہ بلوچستان ءُ ھاس کار واش ءِ ھنّیگیں بد امنی ءِ زمہ وار سپاہ ءُ آئی ءِ چیریں ادارے اَنت. سپاه ءِ وت سر، بلوچانی ھاسیں ٹولی ءِ میان ءَ تُپنگ ءِ بہر کنگ، سیم سرانی بندگ ءَ اے ویل ءُ واکاں گیش کرتگ.