رَسانک نیوز/ سئےشمبے 6 ھُرداد ماه 1404 ءِ بیگاه ءَ، شستون ءِ آسپیچ دمگ ءَ سپاه ءِ چیریں ادارے ٹولی ءَ یک پژو پارس گاڑئے بلوچیں نندوکانی سرا تیرگواری کرتگ. اے تیرگواری ءَ پژو پارس گاڑئے ڈریور، تیر ورگ ءَ پد جاہ ءَ ساہ داتگ ءُ سپاه ءِ ٹولی ءَ آں دگہ چار بلوچ ءَ پہ ھژم ءُ زور ءَ دزگیر کرتگ ءُ چیریں آزار جاہ ءَ برتگ.
کُشگ بوتگیں بلوچے پَجّار «مھمدرزا مزارزهی» 34 سالگ، دادرھمان ءِ چُک، سوران ءَ رھمتآباد دمگ ءِ نندوک، یکے چہ دزگیر بوتگیں بلوچانی پجار «ھسن یزدانی کھنملک» 26 سالگ، مھمدھُسین ءِ چُک، جنگیزھی کٹھمدان ءِ مردم زانگ بوتگ، داں اے ساھت ءَ آں دگہ سئے بلوچ ءِ پجّار زانگ نہ بوتگ.
اے ھال ءِ رِد ءَ، سپاه ءِ چیریں ادارے گاڑیاں ھایلوکس، لنڈکروزر ءُ 1600 ویل ءِ روچ ءَ چہ سہب ءَ ماں آسپیچ دمگ ءَ گشت جتگ ءُ ھمیں کہ آیان ءَ اے بلوچانی گاڑی دیستگ بے جار ءُ توار ءَ آئی ءِ سرا تیرگواری کرتگ.
اے ویل ءَ پد، ایران ءِ سرکاری مڈیا ءَ گوشتگ: آیان ءَ شستون ءِ جُست ءُ پرسی ادارے کارمستر (الیرزا شھرکی) ءُ آئی ءِ لوگی ءِ کُشگ ءَ ھور بوتگ اَنت. دیمترا بلوچستان ءِ کور کمانڈر ءَ ماں تاریک 12 اردیبهشت ماہ 1402 ءَ، آئی ءِ جنوکانی دزگیرئے ھال شنگ کرتگ.
دزگیر بوتگیں ھسن یزدانی ءِ سیادے ءَ امنیتی سروکانی درشان کُرتگیں ھبراں یکسر دروگ لیکتگ ءُ گوشتگ ھماں وھد ءَ کہ شھرکی ءُ آئی ءِ لوگی جنگ بوتگ اَنت، ھسن یزدانی شستون ءِ بندیگجاہ ءَ پہ وتی لوگی ءِ ھکّ مھر ءِ گیشینگ ءِ اَڑ ءُ جیڑہ ءَ بندیگ بوتگ.
گوشگ لوٹیت: پژو پارس گاڑئے نندوکاں بید چہ ڈریور ءَ ھچ کس سلاہ بند نہ بوتگ ءُ امنیتی باسک ءِ ٹولی ءَ بے جار ءُ توار ءَ آیان ءِ سرا تیرگواری کرتگ. گوشگ بوتگ: چیریں اداره ءُ امنیتی باسک چہ دیریں وھدی کُشگ بوتگیں مھمد رزائے پدا بوتگ اَنت، بلے پژو گاڑئے آں دگہ نندوکاں بے ٹکّر زوراَگ ءَ دزگیر کنگ بوتگ اَنت. اے ویل ءَ شش روچ گوستگ، بلے مھمدرزائے بے ساھیں جون آئی ءِ لوگ ءِ مردمان ءَ دیگ نہ بوتگ.
Be the first to comment