رَسانک نیوز/ یکشمبے روچ 4 ھُرداد ماہ 1404 ءِ بانگواہ ءَ، زابل ءَ یک راہ پچیں بلوچ بندیگے کہ زابل ءِ بندیگجاہ ءَ راہ پچ ءُ اے شھر ءَ ادارکے نندوک بوتگ سلاہ بندیں مردمانی لٹ ءُ شاپ ءِ سوب ءَ کُشگ بوتگ. سلاہ بندیں مردمان ءَ آئی ءِ لوگ ءِ سرا اُرش ءَ پد گوں لٹ ءُ چاکو ءَ لٹ ءُ چوپ کرتگ. ٹپّانی باز بوھگ ءَ آئی ءَ ساہ داتگ ءُ بیراں بوتگ.
بیراں بوتگیں بلوچ بندیگ ءِ پجّار «الی باکندہ (ریگی)» 38 سالگ، آروس کرتگ ءُ 12 زھگ ءِ پت، دُزاپ ءِ نندوک زانگ بوتگ.
اے ھال ءِ رِد ءَ، الی دو و نیم سال دیمترا پہ منشیات ءُ مواد ءِ الزام ءَ دزگیر ءُ چہ آذر ماہ 1403 ءَ، زابل ءِ بندیگجاہ ءَ راہ پچیں بندیگے بوتگ.
اے ویل ءِ وھد ءَ الی وتی لوگ ءَ ایوک بوتگ کہ سلاہ بندیں مردمان ءَ آئی ءِ سرا اُرش کرتگ ءُ لٹ ءُ شاپ ءَ پد تچتگ اَنت. داں اے ساھت ءَ جنوکاں ءُ آیاں ءِ سوب چہ الی ءِ کُشگ ءَ زانگ نہ بوتگ.
Be the first to comment