دُزاپ ءِ پیش نُماز، مولوی ابدُل ھمید ءَ بندر کلاھی ءِ ھنّیگیں ھالات ءِ باراوا ٹویٹر اکاؤنٹ ءَ وتی پد کرد درشان کتگ

رَسانک نیوز، زی چارشمبے 24 اردیبھشت ماہ 1404 ءَ، دُزاپ ءِ پیش نُماز مولوی ابدُل ھمید اسماعیل زھی ءَ سرکار ءِ امنیتی باسک ءِ بندر کلاھی ءِ نندوکانی سرا زوراکی ءُ اُدے بلوچ جھمنندانی پادلپاش کنگ ءَ پد، سوشل مڈیائے ٹوئٹر اکاؤنٹ ءَ وتی ھیال ءُ پد کِرد درشان کرتگ اَنت.

مولوی ابدُل ھمید ءَ وتی ٹویٹر اکاؤنٹ ءَ لکھ اِتگ: بندر کلاھی ءُ میناب ءِ اِزّت داروکین ءُ شرپ داریں مردم ءُ جھمنند شرّئئیے ھکّ دار اَنت نہ کہ زوراکی ءُ پادلپاش ءِ. بے کاری ءُ تنگ دستی ءَ آیان ءَ پہ ٹیل ءِ کشّگ ءَ پر ماتگ، آیانی مال ءُ مدّیانی سوچگ ءُ مان دارگ، آیانی سرا زوراکی ءُ چمّ سُہر ءِ دیئگ، آیانی درداں درمان نہ کنت بلکے کُہنیں ٹپّان ءَ کُدینیت ءُ درداں گیش کنت۔ اے وھد ءَ آیان ءَ مہربانی زرورت اِنت.

گوشگ لوٹیت: بندر کلاھی ءِ بلوچ جھمنندانی سرا سرکار ءُ امنیتی باسکانی زوراکی پہ ٹیل کاچاک ءِ نیمون ءَ چہ یکشمبے روچ ءَ 21 اردیبھشت ءَ بُنگیج بوتگ ءُ سئے روچ ءَ پد، سئےشمبے روچ 23 اردیبھشت ءِ بیگاہ ءِ وھد ءَ سرجم بوتگ. اے تچک ءَ بازیں بلوچ جھمنندی چہ امنیتی باسک ءِ کارمندان ءَ لٹّ ءُ کُٹّ بوتگنت ءُ بازیں دگری ءَ چرّہ لگّ اِتگ ءُ سکّ سلّ ءَ ٹپیگ بوتگنت.