دُزاپ ءَ امنیتی باسک ءِ کارمنداں چہ دکان داراں پہ زور باج گرنت ءُ آیاں پُلَنت

رَسانک نیوز، چارشمبہ روچ ءَ 27 پروردین 1404ءَ، رَسانک ءَ ویڈیو ریکارڈی سر بوتگ کہ پیش داراِیت امنیتی باسک ءِ کارمنداں دُزاپ ءِ هیابان ءِ باقری تہا دکان داران ءَ پُلَنت ءُ چہ آیاں زوریں زر ءُ مال گرنت. گجرانی اے بد سلوکی ءُ زوریں پُلَگ ءَ پد، دُزاپ ءِ کار ءُ باری دے گِر سرد بوتگ اَنت ءُ پیشیگیں وڑ ءَ نہ اَنت۔ دُزاپ ءِ جھمننداں چہ گجرے ناشر کاریاں سکّ ءَ پریشان ءُ هیران اَنت.

امنیتی باسک ءِ کارمنداں تھنا دُزاپ ءَ باج ءُ جول نہ گِرَنت بلکے تمامیں بلوچستان ءَ چہ دکانداراں زوریں زر پُلَنت۔ آیاں ماں سرکار ءِ وردی ءُ پچّاں چہ دکانداران ءُ گیراجیاں وتی کاران ءَ ٹاھین اَنت ءُ آیاں مزد نہ دیئنت اگاں یکی وتی هک ءَ بہ لوٹیت گڑا آئی ءَ ھکّل ءُ پاد لپاش کننت۔ ھالاں کہ سلاه بندیں باسکانی کانون ءِ تہا گوشگ بوتگ کہ سرکار ءِ وردی ءُ پوشاک ءَ پہ وتی زاتی کاراں، کار مہ گریت یا کہ چہ سرکار ءِ وردی ءَ ناجائزیں سوب کنگ سکّی ءِ سرا منع اِنت.

بلوچستان ءِ مردمانی درد ءُ تکلیپ پیسرا باز اَنت ءُ گجر ءِ اے ناشر کاریاں آیانی مالی ءُ معیشتی، جانی، نفسیاتی اڑ ءُ جیڑ گیش کرتگ۔ زمہ داران ءُ مسترانی اے بابت ءَ مان مہ یارتی ءُ دلگوش نہ کنگ ءَ بلوچستان ءِ جھمنندانی دل دور داتگ.