رَسانک نیوز
یکشمبهئے رۆچا ۲۸ بهمن ۱۴۰۳، اداره اتلاهاتئے نیروان زئیندینئے هلکا کسرکندئے شهرا اُرش بُرتگ و گۆن زۆراکی و لٹ و شاپ دو جهمنندێن بلۆچ آیانی لۆگئے مردمانی دێما آوار جتگ و نامالومێن جاهے بُرتگ، یکّے چه اے دوێن مردمانی ماتان پشارھۆنئے سئوبا که آییئے چُکّ آوار جنَگ بوتگ وتی ساهی چه دستا داتگ.
اے دوێن بلۆچ جهمنندانی پجّار (اهمد هاکیزهی)، ۲۰ سالگ، اَلیئے چُکّ و (اهمد زئیندینی)، کساس ۱۸ سالگ، مهمدئے چُکّ و هر دوێن چه زئیندینی هلکئے مردم انت چه کسرکندئے دمگا نندۆک انت.
یکّے چه آوار جتگێن ماتانی پجّار که بێران بوتگ (رهیمه هاکیزهیئے)، اُمری ۵۲ بوتگ، ماروپ په ملک ناز، ابراهێمئے چُکّ، شش چُکّئے مات گوَشگ بوتگ.
گێشێن هالانی ردا، یکشَمبِهئے سُهبا کساس ساهت شش و نێما اداره اتلاهاتئے گۆن زاتی درێسێنان اشانی لۆگانی اُرُش بُرتگ و آ چه وابا پاد کرتگ، ابێد چه آمیدگسیئے هُکما گۆن زۆر و لٹ و شاپ و دُژنام آوار جتگ و نامالومێن جاهے بُرتگنتش.
اے اُرُشئے تها، اهمد هاکیزهیئے مات که وتی چُکّئے جنَگ و آییئے آوار جنَگئے گندۆک بوتگ، پشارھونا و آییئے دل اۆشتاتگ و ھما جاگها ساهی داتگ.
چه اے آوار جتگێن جهمنندانی جُرما تنیگتا هالے نێست.
گۆن اێرانئے جموری اسلامیئے ۳۲می کانون اساسیئل اَسلا، مردمانی آوار جنَگ بس گۆن کانونی هُکما ببیت و آییئے جُرم باید اِنت زوتا گوَشگ ببیت. انچۆ گۆن ۵۷۰ئے مجازاتئے اسلامی کانونا، هر کس چه هکومتئے اُگدهداران، مردمانی آزاتیا چه آیان دور بکنت، کانونی مجازاتا مهکوم کنگ ببیت. زۆراکی و بێد آمیدگسی هُکمئے آوار جنَگ گۆن اێرانئے سلامی کانونا جتا اِنت و مُجرمئے هُکوکئے پرۆشۆک هساب بیت.
Be the first to comment