بیرجندا یک بلۆچ جهمنندیئے اێدامئے هُکم اجرا کنگ بوتگ

رَسانک نیوز

سئے شمبهئے بانگواها ۴ دی ۱۴۰۳، کم چه کم یک بلۆچ جهمنندیئے اێدامئے هُکم که دوشمبه رۆچا ۳ دی ماه بیرجندئے مرکزی بندیگا په اێدامئے هُکمئے اجرا کنگئے واستا اێوکێن بندیگا برگ بوتگ اجرا کنگ بوتگ.

اے بندیگئے پجّار (داود گلجایی)، ۳۰ سالگ، میراهمدئے چُکّ، یک پلجێن چکیئے واهُند و زابلئے نندۆک گوَشگ بوتگ.

گێشێن هالانی رِدا، داود ۱۳۹۸ئے سالا نزامی نیروانی دستا گۆن مئوادئے جُرما بیرجندا آوار جنَگ و چه اے شهرئے انگلابئے آمیدگسا اێدامئے واستا مهکوم کنگ بوتگ.

گوشگی اِنت که داودا دوشمبه رۆچا وتی لۆگئے مردم چه اێوکێن بندیگئے برگا هبر داتگ و آییئے لۆگئے مردمان چه زابلا بیرجندا شُتگ بله آ دگه سُهبا بندیگئے اُگدهداران چه آییئے اێدام بئیگا هبر داتگ و داود بێد چه آهری گندُکا اێدام کنگ بوتگ.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.