دُزآپا و پیرسۆرانا چار جهمنندێن بلۆچ نزامی هلکوپترانی گۆما تیرانی آماچ بوتگ‌اَنت

رَسانک نیوز

چارشمبهئے رۆچا ۱۴ آزر ۱۴۰۳، دو نزامی هلکوپترا چار بلۆچێن جهمنند که وتی کارانی واستا وشاپئے کۆهان دُزآپئے دمگان شُتگ بوتگ‌اَنت، گۆن تیر و راکتانی آماچ بوتگ‌اَنت.

گوَشگی اِنت که چار ورنا که دو کس شوانگ بوتگ‌اَنت پیرسۆرانئے کۆها وهدے که دارئے جم کنگئے واستا پیرسۆرانئے کۆهان شتگ‌اَت، نزامی هلیکوپترانی گۆما که آسمانا گشت جنگا بوتگ‌اَنت تیر و راکتانی آماچ بوتگ‌اَنت که اے ورناهان په وتی جانئے بچێنگئے واستا کۆهانی چێرا شتگ‌اَنت و آیان هچ آسیبے نرستگ.

گوَشگ ببیت که پیرسۆران بومی مردمانی زندگیئے جاه اِنت و په دامانی چرگئے واستا و دارانی جم کنگئے واستا سارتێن وهدا کۆهان شُتگ بوتگ‌اَنت و نزامی نیرو گۆن اِشیا که زاننت اے اَشایرانی نندگئے جاه و اے زمین و اوا اَشایرانی جاه اِنت پدا هم تیرگواریش کُرتگ.