بزمانا سئے بلۆچ جهمنند که دو ٹێلکشێن مردم هم بوتگ گۆن ماشینئے ڈیکّر ورگ و آس گِرگا بێران بوتگ‌اَنت

رَسانک نیوز

شَمبِهئے شپا ۱۰ آزر ۱۴۰۳، گۆن دو ماشینئے چپ کنگ و آس گِرگا ایُل پزلئے دمگان، سئے بلۆچ جهمنند که چه آیان دو ٹێلکشێن ماشینئے نندۆک بوتگ‌اَنت آسئے تها وتی ساهِش چه دستا داتگنت.

دو کس چه اے ٹێلکشانی پجّار (مهرزاد هسئین زهی)، ملکئے چُکّ، پێرۆزآبادئے هلکئے مردم چه گریکانئے دمگان، (مهرداد هسئین زهی)، سُهرابئے چُکّ چه مهمدانئے هلکا دُزآپئے دمگان گوَشگ بوتگ و چه آ دگه جهمنندئے پَجّارا تنیگت هالے نێست.

گێشێن هالانی رِدا، پرایدئے مردم که دو کس بوتگ‌اَنت گۆن پژوئے نندۆکا که یک مردمے بوتگ پد چه ڈیکّر ورگ و آس گِرگا، آسئے تها وتی ساهِش چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنگ بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.