پهرئیا یک بێران بوتگێن جنێنیئے لاش درگێجگ بوتگ

رَسانک نیوز

دوشمبهئے سُهبا ۲۳ مهر ۱۴۰۳، یک نامالومێن جنێنیئے لاش که گۆن تیرئے گۆما کُشگ بوتگ و تیرا مان آییئے سرا لگّتگ بوتگ ابترئے هلکا چه پهرهئے دمگان برگ و وئیل کنگ و هلکی مردمانی دستا درگێجگ بوتگ.

چه اے جنێن آدمئے پَجّارا تان انّون هچ هالے نێست.

گوشگ بیت که کساس سُهبئے ساهت نُها، اے جنێن جهمنندئے لاش ابترئے نزّیکیا که گۆن تیرئے گۆما کُشگ بوتگ و یک پُچّیئے تها و وئیل کنگ بوتگ درگێجگ بوتگ.

گندۆکێن مردمان گوَشتگ که چه آییئے کُشگ بئیگا بازێن وهدے نگوَستگ بوتگ چیا که آییئے لاش درگێجگئے وهدا هُشک نبوتگ. چه کُشگئے هالا و جنۆکانی جنَگئے هالا و آیانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.