رَسانک نیوز

دوشمبهئے رۆچا ۲۹ مرداد ۱۴۰۳، یزدئے مرکزی بندیگئے اُگدهداران کم چه کم پنچ کسئے اێدامئے هُکم که چه آیان دو بندیگ بلۆچ، دو اپگانستانئے مردم و یک کس دگه گۆن نامالومێن پَجّاران اجرا کنگ بوتگ.

دوێن بلۆچێن بندیگانی پجّار (اَبدُل رهمان دامنی (گرگێچ))، ۳۴ سال انتی، هُدا بکشئے چُکّ، سور کُرتگێن و دو چُکّئے پت و (اَبدُل ریوپ)، ۳۳ سالگ، سور کُرتگێن، هر دوێن دُزآپئے نندۆک گوَشگ بوتگ و آ دگه سئیێن کس که مئواد و کتلئے جُرما مهکوم کنگ بوتگ‌اَنت تان انّون هچ هالے نێست.

گوَشگ بیت که اَبدُل رهمان و اَبدُل ریوپ یک هۆریگێن پروندهے تها ۱۴۰۱ئے سالا، مئوادئے جُرما یزدئے ایست بازرسیا آوار جنَگ و هر دوێن چه یزدئے آمیدگسا اێدام و اَبدُل رهمان گۆن یک درجهے کمتر مهکوم بوتگ‌اَنت که شَمبِهئے رۆچا ۲۷ مرداد بندیگئے آمێن بندا چه یزدئے مرکزی بندیگا، بندیگئے اێوکێن جاها په هُکمئے اجرا کنگا برگ بوتگ.

گوشگی اِنت که بلۆچێن بندیگانی (اَبدُل رهمان دامنی) و (اَبدُل ریوپ)ئے لۆگئے مردمان پێسر چه اێدامئے هُکمئے اجرا کنگا آهری گِند و نِد کُرتگ.

همے جاهے تها، هال وشّئے رسانکا هم چه یک پکاێن جاهے هبر شِنگ کُرتگ که همے هئیال رئوت یکّے چه آ دگه سئیێن چه بلۆچێن جهمنندان بوتگ‌اَنت.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.