رَسانک نیوز

شَمبِهئے اَسُرا ۲۷ مرداد ۱۴۰۳، بلۆچے پهره و بزمانئے راها، نزیک پهرهئے پنجاه کیلومتریا گۆن سلاهبندێن مردمانی تیرگواریان تیرانی آماچ بوتگ و گۆن تیرانی ورگا بێران بوتگ و آییئے ماشین آس جنَگ بوتگ.

اے جهمنندئے پجّار (مهمد بامری)، ۲۷ سال انتی، کریم بکشئے چُکّ، سور کُرتگێن و چُکّئے واهُند دلگانئے دمگان همیدُلّاهئے هلکئے مردم گوَشگ بوتگ.

همے هالانی رِدا، کساس ساهت پنچا، سلاهبندێن مردمان پهرهئے پنجاه کیلومتریا پهره و بزمانئے راها، اشیئے ماشینئے نێمگا تیرگواری کُرتگ که آیی رَند چه اِشیا که چه ماشینا درآتکگ تیرانی آماچ بوتگ و گۆن تیرانی ورگا وتی ساهی چه دستا داتگ و آییئے پژو پارسێن ماشینِش آس جتگ و چه اۆدا شتگ‌اَنت.

چه اِشانی پجّار و آیانی جنَگئے سئوبا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.