رَسانک نیوز

پنچشَمبِهئے رۆچا ۲۵ مرداد ۱۴۰۳، مگس و سب سۆرانئے راها یک ٹێلکشّێن ماشینیئے چپّ کنگئے گۆما، ماشینئے دو نندۆک ٹپّیگ بوتگ‌اَنت.

چه اے دوێن ٹێلکشّێن جهمنندانی پجّارا تان هبرئے نبیسگئے وهدا هچ هالے نێست.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.