رَسانک نیوز

جمهئے رۆچا ۱۲ مرداد ۱۴۰۳، سئے بلۆچێن جهمنندئے لاش که رَند چه نزامی نیروانی تاچێنگا تبسئے ریگستانئے تها وتی ساهِش چه دستا داتگ، گۆن دو هپتگئے گوزگا که نزامی نیروانی آ دُنبال داتگ‌اَنت تبسئے رێگستانئے نێمگا تتکگ‌اَنت، آیانی سیاد و وارسانی دستا درگێجگ بوتگ‌اَنت.

اے جهنندێن بێران بوتگێن بلۆچانی پجّار (مهمدگل شه بکش)، ۴۶ سالگ، مهمد اُمرئے چُکّ، سور کُرتگێن و پنج چُکّئے پت، (یاسر شه بکش)، ۳۵ سالگ، اَبدللّاهئے چُکّ و سور کُرتگێن و سئے چُکّئے پت و (ابراهێم نوتی زهی)، ۲۷ سالگ، دراهێن دومگئے هلکئے نندۆک چه شوروئے دمگان چه زاهدانئے شهرا گوَشگ بوتگ‌اَنت.

اے جهمنندان کساس دو هپتگا پێسر چه دُزآپ، مشهدئے نێمگا درکپتگ‌اَنت که مشهدئے نزّیکیا نزامی نیروانی آ دُمبال داتگ‌اَنت و تبسئے رێگستانا شتگ‌اَنت که اۆدا گۆن راهئے گار کنگا گۆن تُنّیگے و شُدئے سئوبا وتی ساهِش چه دستا داتگ.

گوَشگ بیت که رَند چه آیانی بێگواهیا و آیانی هلکئے جُست و پرسان زانگ بوتگ که آ رێگستانئے نێمگا شتگ‌اَنت و هئیال همے بوتگ که آ گار بوتگ‌اَنت و آیانی هلکئے مردم و سیاد گۆن پَٹّ و پاسی گروپئے جۆڑ کنگا رَند چه بازێن کۆشستان جُمَهئے سُهبا آیانی لاش که چه آیانی موتوران آ کَشتر بوتگ‌اَنت، درگێجگ بوتگ‌اَنت.