رَسانک نیوز

پنچشمبهئے رۆچا ۵ مرداد ۱۴۰۳، سلاهبندێن دُزّان آسپیچ و سراوانئے راها یک سئواری ماشینے وتی تیرانی آماچ کُرتگ که ماشینے آس گِرَگئے سئوب بوتگ.

گوَشگی اِنت که پنچشمبهئے شپا که سلاهبندێن دُزّ گوزۆکێن ماشین و ٹێلکشانی کمینا بوتگ‌اَنت یک جهمنندیئے ماشینئے نێمگا تیرگواری کُرتگ که رانندها هچ نبوتگ بله سئوب بوتگ که ماشین آس بگیپت که جهمنندێن مردمان گۆن هاکئے گۆما آس هامۆش کُرتگ.

گوشگ ببیت که رند چه ریاست جماوریئے پێش دارگی اۆٹا رَند بلۆچستان ناشناسێن سلاهبندێن دُزّانی جاه بوتگ که اێرانئے جماوری اسلامیئے رژیمئے دستئے چێرا دُزّی کننت، کُشنت و گرئوگان گرنت تا اے ڈگارا نا امن پێش بدارنت و په نزامی نیروانی گێشتریئے واستا په بلۆچستانا وتی واستا راهے پچ بکننت.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.