کهنوج ءَ انتزامی ٹولییے تیرگواری ءَ بلوچیں ٹیلکشّی ءَ ساہ داتگ

رَسانک نیوز/ سئے شمبے روچ 5 آبان ماہ 1405، «اِرپان زبردست»، 25 سالگیں ٹیلکشّیں بلوچے، کهنوج ءِ راھا چه انتزامی ٹولییے آییئے گاڑی ئے سرا تَچکیں تیرگواری ءُ گاڑی ئے لیٹ ورگ ءَ ساھی داتگ. اے جهمنند ئے گاڑی چه بنزین ءَ بار بوتگ ءُ ویل ئے وھدا انتزامی ٹولییا بید چه پیسریگیں جار ءُ دلگوش دیئگ ءَ آییئے گاڑی ئے سرا تیرگواری کرتگ.

اے بلوچئے پجّار «اِرپان زبردست»، 25 سالگ، اسهاک ئے چُک، آروس کرتگ ءُ کهنوج ئے نندوک ءُ جهمنند زانگ بوتگ.

سربوتگیں ھالانی رِد ءَ، اے ویل سئے شمبے روچ ءَ ساھت 17 ئے وھدا کهنوج ئے ڈنّ ئے راھا پیش آتکگ. چه انتزامی ٹولییے تیرگواری ئے سئوب ءَ گاڑییے ٹایر ترکّتگ ءُ گاڑی راہ ءَ ڈنّ بوتگ ءُ لیٹی وارتگ، که اے نتیجگ ءَ ارپان ءَ ساہ داتگ. گوں اشیا که آییئے بے ساھیں جون ماں برپ‌هانگ ءَ ائیر اِنت په مرک ئے اَلّمیں سئوب ئے زانگ ءَ گیشتریں پٹ ءُ چارے په کار اِنت.

ارپان ئے سیادیا آییئے زندمان ئے سرا چمشانک داتگ ءُ گوشتگ: آیی ماں ھُردیا چورہ بوتگ ءُ وتی پیریں مات ءُ لوگئے مردمانی مالی جنجالانی دیمپان بوتگ. اے وڑا که مردم ءَ گوشتگ: گوں اشیا که ارپان ءَ بازیں مالی جنجال ماں دیم بوتگ اَنت بله تاں ھم په وتی ھوریں زندمان ءَ تئیار بوتگ ءُ گوں کمّیں بنزین ئے بَرَگ ءُ آرگ ءَ وتی ھمک روچی ھرچ ءَ درے آؤرتگ.