دزاپ ءَ امنیتی ٹولییے تیرگواری ءَ کُشگ بوتگیں دوئیں بلوچانے پجّار زانگ بوتگ

رَسانک نیوز/ دوشمبے 20 مهر ماہ 1405، دزاپ ءِ بازار مشترک دمگ ءَ کُوزگ میدان ئے نزّیک ءَ چه سادہ پوشیں امنیتی ٹولییے تیرگواری ءَ کُشگ بوتگیں دوئیں بلوچانے پجّار زانگ بوتگ. پیشترا رَسانک ءَ اے دو بلوچئے کُشگ بوھگئے ھال شِنگ کرتگ.

اے دو بلوچئے پجّار «مهمد ریگی (سنجرانی)»، 22 سالگ ءُ «ازیز ریگی»، 23 سالگ، اُرپ «لالا گل» گوشگ بوتگ. مهمد ریگی ٹیلکشّیں گاڑیئے شاگرد بوتگ ءُ چه پادا ناتوان بوتگ. ھمے وڑا، ھال سرکنوکان ءَ گوشتگ: اے ویل ءَ سئے اُمیں مردمے ھم ھور بوتگ، بله داں انگت ءَ آییئے اَلّمیں پجّار زانگ نه بوتگ.

ھال سرکنوکانی رِد ءَ، ھماں وھدا که امنیتی ٹولی اے مردمانی نزّیک ءَ شُتگ اَنت آیان ءَ وتی دست په تسلیم بئیگ ءَ بُرز ءُ وتا نزامیانی دست ءَ داتگ، بله امنیتی ٹولی ءَ پدا ھم آیانی سرا تیرگواری کرتگ. رَند چه اشیا که ڈگار ئے سرا کپتگ اَنت چه نزّیک ءَ آیانی سرا تیرگواری برجاہ بوتگ. ویل ءَ رَند امنیتی ٹولییا آیانی لاش گوں وتا برتگ اَنت ءُ ھمے وڑا جاھئے نزّیکیں دکانانی دوربین ئے اَکس ءُ بُت گار اِش کرتگ.

گوشنت: لوگئے مردماں چُنت روچ اِنت که بے ھالے سرپدئے اِنت ءُ آیان ءَ نه زانتگ که مئی مردم زندگ اَنت یانکه کُشگ بوتگ اَنت. چُنت روچ ءَ رَند امنیتی سروکان ءَ گوں آیانی لوگئے مردماں جڑتگ اَنت ءُ گوشتگ: که اے دو مردم کُشگ بوتگ اَنت ءُ آیانی بے ساھیں جون ماں برپ ھانگ ءَ ائیر اَنت. امنیتی سروکان ءَ چه ھاندان ئے مردماں په لاشانی دست ءَ دیئگ ءَ زر لوٹتگ.

سرکاری میڈیا ءَ ویل ءَ رَند گوشتگ: دزاپ ءِ کوزگ میدان ءَ ماں امنیتی کارواییا دو چئیر بوتگین ءُ سلاہ‌بندیں مردم کُشگ بوتگ. اے کِسّه گوں ھال سرکنوکانی اے گپّ که کُشگ بوتگیں مردمان ءَ وتا تسلیم ءُ نزامیانی دست ءَ داتگ چپّ اِنت.