شستون ءُ کوھگ ءِ راہ ءَ پد چہ رہگوزین گاڑیانی سرا تیرگواری ءُ پُلَگ ءَ مهلوک ءَ امنیتی ادارہ آنے دو جھمنندیں کارندگ دزگیر کرتگ

رَسانک نیوز/ 7 اسپند ماہ 1404 ءَ، شستون ءُ کوھگ ءِ راہ ءَ، دو سلاہ بندین ءُ جھمنندیں مردمان ءَ کہ چہ امنیتی ادارہ آں بوتگ اَنت ءُ آیان ءَ سپاہ ءِ سلاہ گون بوتگ رَند چہ رہگوزیں گاڑیانی پدا کپگ، تیرگواری ءُ ترس ءُ بیم ئے دیگ ءَ گوں مهلوک ئے مان کپگ ءَ دزگیر بوتگ اَنت.

یکی چہ سلاہ بندیں مردماں کہ مهلوک ءَ دزگیر کرتگ ویڈیو رکاڈ ءَ مهلوک ئے جُست ءُ پرس ئے وھد ءَ «زاھد نکیبی»، کریچ ئے چُک ءُ کوھگ ءِ نندوکیں مردم ءُ سپاہ چیئریں ادارہ ئے چہ شستون ءِ کُدس بُنجاہ ءِ کارندگاں زانگ بوتگ۔ اے مرد یک ھشت نپری ٹولی ئے بہر ءُ پہ نیمون ءَ دمگ ءَ پہ امنیتی کاروائیان ءَ دلگوش بوتگ آیانی سروک «اکبری» نامیں مردمی اِنت کہ بُنجاہ ءِ دست ءِ چیئرا کار کنت.

رَسانک ءِ ھال سرکنوکانی رِد ءَ، اے دو مرد ءَ گوں سپاہ ءِ سلاہ ءُ دست جتگیں نمبر پلیٹیں گاڑی ءَ رہگوزیں گاڑیانی پدا کپتگ ءُ تیرگواریش کرتگ۔ تاں اِداں کہ یک ٹیلکشّیئے گاڑی ئے سرا ھم تیرگواریش کرتگ.

سربوتگیں ویڈیو رکاڈ ءَ، دزگیر بوھگ ءَ پد اے دوئیں مردماں وت ءَ چہ امنیتی ٹولی ءَ لیک اَنت ءُ گوشنت ما پہ گاڑیانی کنٹرول ءُ پٹ ءُ پول ءَ اَتکگیں۔ گوں اے جاور ءَ مهلوک ءَ گوشتگ اگاں شمئی مراد گاڑیانی چارگ ءُ کنٹرول بوتگ باید اِنت کہ شما پہ سرکاری رنگی ءَ چیک پوسٹ لِکّ بکرتین ءُ گاڑیاں ٹِکّ ءُ پاس بکرتین نہ کہ وت سر ءُ بید چہ دلگوش دیگ ءَ مهلوکئے سرا تیرگواری بکنیت.

رَسانک ءِ ھال سرکنوکان ءَ گوشتگ: دمگ ءِ بازیں دُزّیئے ھمیں مردم کہ گوں امنیتی ادارہ آں جُڑ اِتگنت کرتگ۔ مهلوک ءَ پد چہ ایشی ءَ کہ انتزامی ٹولی جاہ ءَ لوٹتگ دوئیں مردمان ءَ پہ دُزّ ئے ھساب ءَ سرکار ئے دست ءَ داتگ ءُ چہ سرکار ءَ لوٹتگش کہ آیانی ھلاپ پروندہ جوڑ بکنت ءُ اِنساپ ءَ پرجاہ بدار اِیت.

اۓ ویل ھماں وھدا پیش اَتکگ کہ انّیگیں سالان ءَ باز برا زاتی ءُ ٹیلکشّیں گاڑیانی سرا تیرگواری ئے ویل رپوٹ بوتگنت۔ لہتیں چہ اے دُزّ ءُ ناشر کار گوں امنیتی ادارہ آن ءَ جُڑ اِتگنت۔ پیسرا ھم اے بابت ءَ تَچکیں گواہ ءُ سبوت ھم شنگ ءُ پیش کنگ بوتگ، اے چُنتمیں گشت اِنت کہ مهلوک ئے سرا تیرگواری کنوکاں دزگیر ءُ آیانی پجّار چہ امنیتی ادارہ آں زانگ بیت.