رَسانک نیوز/ مروچی چارشمبے 29 بہمن ماہ 1404، راسک ءَ جکیگور ءُ چھبار ئے میان راہ ءَ، جکیگور دمگئے نزّیک ءَ چہ پراید سواری ءُ سایپا باری گاڑیانی ٹوکر ورگ ءَ دو ٹیلکشّ ءَ ھور، شش مردم بیراں بوتگ۔ ھال سرکنوکان ءَ گوَشتگ: اے ویل گوں دوئیں گاڑیانے بُن گِرَگ ءَ ھوار بوتگ ءُ نزّیکیں دمگاں آس کشاں جاہ ئے نہ بوھگ ءُ گاڑیانی نندوکان ءَ کمک کنگئے چارہ ئے نہ بوھگ ءَ دوئیں گاڑیانی مردماں آس ءَ سوتکگ ءُ ساہ داتگ.
رَسانک ءَ پراید گاڑی ئے چار اِیں نندوک ئے پجّار «ھلیل سلامی»، «اسلم بلوچزھی مُکدم»، «کریمبکش سئیدی»، ءُ «ابراھیم آزربین»، سجّهیناں سرباز ئے نندوکیں مردم زانتگ، کہ جمائت تبلیگ ئے چلّہ ءَ پدتّر اِتگنت۔ رَسانک ءَ یکی چہ بیراں بوتگیں ٹیلکشّ آنے پجّار «اِرپان شہ بکش»، ابداللہ ئے چُک، دُزاپ ئے سورنایی دمگئے نندوکیں مردم زانتگ کہ سایپا گاڑی ءَ بوتگ.
رَسانک ئے ھال سرکنوکانی رِد ءَ، پراید گاڑی ئے چاریں نندوک ءُ دوئیں ٹیلکشّ آن ءَ ماں اے ویل ءَ ساہ داتگ.
ھال سرکنوکان ءَ گوشتگ: زوریں ٹوکر ءُ ویل ئے جاہ ءِ نزّیک ءَ آس کشاں جاہ ئے نہ بوھگ ءُ آس ئے زیتّ ءَ در گِرگ ءِ سوب ءَ دمگ ءَ اُوشتوکیں مردمان ءَ ھم نتوانتگ آیاں کمک بکننت.
Be the first to comment