رَسانک نیوز/ مروچی چارشمبے 22 بہمن ماہ 1404، راجی پدائیانی سنگر ءَ لُکّیں جارتاکی شِنگ کرتگ ءُ پہرہ ءَ مرساد رینجرز ئے کاروان ءِ سرا اُرش ءِ زمہ واری ءَ منّتگ.
اے گل ئے شِنگ کرتگیں جارتاک ئے رِد ءَ، رژیم ئے جوڑ بوھگئے سالروچ ءَ، ھماں وھدا پادلپاش کنوکیں مرساد رینجرز ئے کاروان مهلوکئے ترس ءُ بیم دیگ ءُ وتی زور ءُ واک ئے درا کنگ ءَ دلگوش بوتگ، مئی پدائیان ءَ اے کاروان ئے سرا اُرش کرتگ ءُ چہ میان ءَ بُرتگ. «جارتاک ءَ گوشتگ اے اُرش ئے گیشتریں ھال دیمترا شِنگ بنت.»
دیمترا رَسانک ءِ ھال سرکنوکان ءَ پہرہ ءِ مهمدآباد دمگئے نزّیک ءَ نزامی کاروان ئے سرا زوریں تراک ءِ ھال سر کرتگ۔ ھال سرکنوکان ءَ گوشتگ: تراک سکّ ءَ زور دار بوتگ ءُ آئی ءِ توار ماں پہرہ ئے بازیں دمگی اِشکونگ بوتگ، تراک ءَ مرساد ئے دو جنگی گاڑی تباہ بوتگ اَنت۔ ویل ءَ پد، تراک ءِ جاہ ءَ امنیتی ءُ انتزامی کارمند آنی کچّ گیش کنگ بوتگ.
ایران ئے سرکاری زمہ واران ءَ اے ھال ئے راستی ءَ منّتگ اَنت بلے چہ اے اُرش ءَ بوتگیں نُکس ءُ تاوان ءِ باراوا وتی پدکِرد اِش نہ داتگ۔ اے درگت ءَ چہ سرکار ئے نیمگ ءَ گیشتریں ھالے شِنگ نہ بوتگ.
Be the first to comment