سب ءُ سوران ءَ سلاہ بندیں مردمانی تیرگواری ءَ امنیتی ٹولی ئے کارمندی کُشگ بوتگ، راجی پدائیانی سنگر ءَ اے اُرش ئے زمہ واری منّتگ

رَسانک نیوز/ چارشمبے روچ 15 بہمن ماہ 1404، سوران ئے کارگر روڈ ءَ، سئےشمبے 14 بہمن ماہ ئے شپ ءَ راجی پدائیانی سنگر ئے جُھدکار آن ءَ امنیتی ادارہ آنے کارمندی یے سرا اُرش کرتگ ءُ کُشتگ. پد چہ ایشی ءَ سرکاری میڈیا ءَ سے ھبر راست لِیک اِتگ ءُ منّتگ کہ سوران ءَ امنیتی کارمندے چہ سلاہ بندیں مردمانے تیرگواری ءَ کُشگ بوتگ۔ راجی پدائیانی سنگر ءَ وتی کانال ءَ اے ھال شِنگ کرتگ ءُ اُرش ئے زمہ واری منّتگ.

اے ھالئے رِد ءَ، راجی پدائیانی سنگر ئے شِنگ بوتگیں جارتاک ءَ گوشگ بوتگ اے گل ءَ سرکار ءَ پہ زھرشانی کنوکیں مردمانی کُشگ ءُ پادلپاش کنگ ءِ جواب دیگ ءَ، اے کاروایی کرتگ۔ اُرش ءَ سب ءُ سوران ئے پراجا ئے چیئریں بہرئے جانشین ءَ پنچ تیر وارتگ ءُ سکّ ءَ ٹپیگ بوتگ.

ھمیں پیم دیمترا سرکاری میڈیا ئے چینلی ءَ اے ھال راست زانتگ ءُ گوشتگ: ھماں وھدا کہ امنیتی کارمندے چہ سپاہ ءِ بُنجاہ ءَ در اَتکگ پٹ پٹی ءَ سوار سلاہ بندیں مردماں آئی ءِ پدا کپتگ ءُ تیر اِش کرتگ۔ اے چینل ءَ ٹپیگ بوتگیں امنیتی کارمند ئے پجّار پاسدار «ھمید رزا ھاتمی» زانتگ.

داں انگت ءَ سوران ئے پرمانداری، انتزامی کورکمانڈر ءُ اے دگہ زمہ واریں ادارہ آن ءَ اے ویل ءُ راجی پدائیانی سنگر ئے جارتاک ءِ بابت ءَ وتی پدکِرد نہ داتگ.