رَسانک نیوز/ چارشمبے 15 بہمن ماہ 1404، یکشمبے شپ ءَ 14 دی ماہ ءَ دُزاپ ءَ بلوچی کہ پژو پارس گاڑی ئے نندوکان ءَ آوار جتگ، ویلئے 31 روچ ءَ پد داں انگت آئی ءِ ھالے سرپد ئے نیست اِنت۔ ھماں وھدا کہ اے بلوچ وتی ناکو زھت ئے ھوری ءَ چہ پوٹبال ئے میدان ءَ ڈنّ بوتگ، اے کاروایی ئے دپّ ءَ کپتگ، بازیں وھدا بے ھال ءُ سرپد بوھگ ءَ آئی ءِ لوگئے مردم ھاسکار مات ءَ سکّ دل پریشان کرتگ، ھاندان ئے مُدامی رَندگیری ءُ ھر روچیں امنیتی، جُست پُرس کنوکین ءُ زمہ واریں ادارہ آنے ترّ ءُ تاب پہ آئی ءِ سرنبشت ئے روژناک بوھگ ءَ بے سوب بوتگ ءُ اے ادارہ آن ءَ ھچ پیمیں گامگیجی نہ زورتگ.
رَسانک ءَ اے بلوچئے پجّار «مهمدادریس اسمائیلی»، مهمدیونس ئے چُک، دُزاپ ءِ جھمنند زانتگ.
رَسانک ئے ھال سرکنوکانی رِد ءَ، ھماں وھدا کہ ادریس وتی ناکو زھت ئے ھُوری ءَ چہ پوٹبال ئے میدان ءَ ڈنّ ءَ در اَتکگ، پژو پارس گاڑی یے آیانی دیم داشتگ کہ گاڑی ئے نندوکیں مردمان ءَ روایتی گُد گورا نہ بوتگ. گاڑی ئے نندوکاں نزّیک ءَ شُتگ اَنت ءُ جار ئے جتگ۔ گوں اے پیش اَتک ءَ ادریس ئے ناکو زھت چہ جاہ ءَ در شُتگ، بلے ادریس دست ءَ کپتگ ءُ آیان ءَ پہ زور وتی گاڑی ءَ تہا کرتگ ءُ بُرتگ.
ادریس ئے ھاندان ءَ دُزاپ ءِ جُست پُرس کنوکیں ادارہ ءَ وتی شکایست داتگ، بلے داں انگت ھچ پیمیں نتیجگی دست نہ کپتگ. لوگئے مردمان ءَ نمبرے شِنگ کرتگ ءُ چہ مهلوک ءَ لوٹتگ اِش ھر کس ءَ آئی ءِ باراوا ھالے دست کپت، ھالاں اے نمبرا سر بہ کنت.
ھمیں وڑا ھاندان ءَ گوشتگ اگاں آوار جنوکان ءَ گوں ما ھساب ءُ کتابی است، ما پہ ھبر ءُ دیوان ءَ تیار اِیں.
Be the first to comment