دُزاپ ءَ بلوچی کہ نوزدہ روچ دیمترا سپاہ ئے چیئریں ادارہ ءَ دزگیر کرتگ، داں انگت ءَ بے ھالے سرپدئے اِنت

رَسانک نیوز/ یکشمبے 12 بہمن ماہ 1404، دزاپ ءَ بلوچے کہ نوزدہ روچ دیمترا سپاہ ئے چیئریں ادارہ ءَ دزگیر کرتگ داں انگت ءَ بے ھالے سرپدئے اِنت۔ ھاندان ءَ آئی ءِ سرا بستگیں الزام، دارگ ئے جاگہ ءُ جِند ئے جاور ئے بابت ءَ ھچ پیمیں ھالے دست نہ کپتگ.

اے بلوچئے پجّار «سئید ھسن‌زھی»، کِساس 36 سالگ، پردل ئے چک، بُندر ءَ دُزاپ ءِ پوگی دمگئے نندوکیں مردمی زانگ بوتگ.

اے ھالے رِد ءَ، 23 دی ماہ ءَ سپاہ ئے چیئریں ادارہ ئے سادہ پوشیں ٹولی ءَ اے بلوچ چہ دُزاپ ءِ شہر ءَ بید چہ کسور ءُ میئار ئے گوشگ ءَ دزگیر کرتگ ءُ چیئریں جاگہے بُرتگ، اے دوران ھاندان ءِ مردمان ءَ آئی ءِ ھچ وڑیں ھالے دیگ نہ بوتگ، نہ کہ چہ سرکار ئے نیمگ ءَ زمہ واری ءَ گوں لوگئے مردماں پہ آئی ءِ پروندہ ءُ اِنساپ ءِ جاوراں گپّ ءُ ھال کرتگ.

گوشگ بیت پنچشمبے روچ 9 بہمن ماہ ءَ امنیتی ٹولی ءَ یک بری پد ءَ سئید ئے لوگئے سرا اُرش کرتگ ءُ آئی ءِ مات ءُ گُوہار ئے موبائیل پئون گوں وتا برتگ اَنت۔ اے کاروایی سئید ئے دزگیر بوھگئے دو‌ ھپتگ ءَ پد کنگ بوتگ، امنیتی ادارہ ئے اے کار ئے سوب داں انگت زانگ نہ‌ بوتگ۔ اے کاروایی ءَ لوگئے مردمانی دل پریشانے پہ امنیتی زُوراکی ئے گیش بوھگ، ھاندان ئے رندگیری آنے دیم ئے دارگ، رابتا آنے بُرّگ باراوا گیش کرتگ.

اے بلوچئے دزگیر کنگئے سوب ءُ آئی ءِ سرا بستگیں الزام داں انگت زانگ نہ بوتگ اَنت.