رَسانک نیوز/ شمبے 11 بہمن ماہ 1404، پنوچ ءَ سلاہ بندیں مردمانی تیرگواری ءَ دو بلوچ ءَ تیر وارتگ کہ یکی کُشگ ءُ آں دگہ سکّ ءَ ٹپیگ بوتگ ءُ نادراہجاہ ءَ سر اِش کرتگ.
رَسانک ءَ کُشگ بوتگیں بلوچئے پجّار «بهنام اربابی»، موسا ئے چُک، پنوچ ئے نندوکیں مردم ءُ ٹپیگ بوتگیں بلوچئے پجّار «ابراھیم امیری زادہ»، پنوچ ئے جوگز دمگئے نندوکیں مردمی زانتگ.
رَسانک ءِ ھال سرکنوکانی رِد ءَ، اے ویل زاتی جیڑہ ءُ ٹکّری ءَ پد پیش اَتکگ ءُ گوشگ بوتگ بهنام اربابی ئے برات ابراھیم امیری زادہ ئے وام دار بوتگ۔ ھمیں گپّ ءِ سرا اے دوئیں گوں یکّا دگرا اَڑتگ اَنت ءُ آیانی میان ءَ ٹکّر بوتگ۔ ٹکّر ئے وھدا تیرگواری ءَ، بهنام ءَ تیر وارتگ ءُ جاہ ءَ ساہ داتگ.
ھال سرکنوکان ءَ گوشتگ ٹکّر ئے دیمروی ءَ «ابراھیم امیری زادہ» ءَ ھم چہ دیمیں مردمانی تیرگواری ءَ تیر وارتگ ءُ سکّ ءَ ٹپیگ بوتگ۔ درمان ئے بُنگیجی کاروایی ءَ پد، بازیں ٹپّ ءُ ھالت ئے نہ گیگ بوھگ ئے سوب ءَ، ابراھیم پہ شرتریں درمان ءَ گوں بالی گُراب ءَ پہرہ ئے نادراہجاہ آن ءَ سر کنگ بوتگ.
Be the first to comment