رشت ءَ دزگیر بوتگیں چار بلوچ تہران ءَ شور دیگ ءَ پد بے ھالے سرپدئے اَنت

رَسانک نیوز/ جمے 10 بہمن ماہ 1404 ءَ، رشت ءَ چار بلوچیں کارگر، تیوگیں ملک ءَ تالانیں مهلوکئے زھرشانی ئے پادلپاش کنگئے وھدا دزگیر بوتگ اَنت، چُنت روچ بے ھالے سرپد ئے بوھگ ءَ رَند تہران ءَ شور دیگ بوتگ اَنت.

دزگیر بوتگیں دو بلوچئے پجّار «سئید رئیسی»، 31 سالگ، پئیر مهمد ئے چُک، آروس کرتگ ءُ یک گونڈیں زھگئے پِت، «مھران باکری»، 27 سالگ، اکبر ئے چُک، ھر دو گِہ ئے چامپ دمگ ءِ نندوکیں مردم زانگ بوتگ اَنت۔ دزگیر بوتگیں دو دگہ بلوچئے پجّار داں انگت زانگ نہ بوتگ.

ھال سرکنوکانے رِد ءَ، اے چار بلوچ کہ رشت ءَ کارگری ءَ دلگوش بوتگ اَنت، گُمان ایشنت کہ تیوگیں مُلک ءَ تالانیں مهلوکئے زھرشانی ئے پادلپاش کنگ ءَ پد ماں تاریک شمبے روچ 20 دی ماہ ءَ دزگیر بوتگ اَنت۔ دزگیر بوھگ ءَ پد، پہ مدتی ءَ بے ھالے سرپدئے بوتگ اَنت ءُ ھاندان ءَ آیانی دارگ ءِ جاگہ ئے بابت ءَ ھچ پیمیں ھالے دست نہ کپتگ.

گوشنت انّیگیں روچاں دزگیر بوتگیں مردمانے ھاندان ئے گوشتگ اَنت کہ شمئے مردم چہ رشت ءَ پہ تہران ءَ شور دیگ بوتگ اَنت۔ بلے آیانی دارگ ءِ جاگہ، دزگیر کنوکیں ادارہ، پروندہ آنے اِنساپ ءِ جاور ئے باراوا ھچ ھالے سرپدئے دیگ نہ بوتگ.