مشهد ءَ نزامی ٹولی ئے زھرشانی کنوکیں مردمانے پادلپاش کنگ ءِ وھدا تیرگواری ءَ بلوچے کُشگ بوتگ

رَسانک نیوز/ جمے 3 بہمن ماہ 1404 ءَ، دُزاپ ءِ نندوکیں بے سجلیں بلوچی جمے 19 دی ماہ ءَ مهلوکئے زھرشانی ئے پادلپاش کنگئے وھدا نزامی ٹولی ءِ تیرگواری ءَ، تیر وارتگ ءُ سکّ ءَ ٹپیگ بوتگ۔ دو روچ ءَ پد 21 دی ماہ ءَ ٹپّانی باز بوھگ ءِ سوب ءَ ماں نادراہجاہ ءَ ساہ داتگ.

اے بلوچئے پجّار «دستگیر گرگیج»، کِساس 30 سالگ، زاھر ئے چُکّ، آروس کرتگ ءُ دو کسانیں زھگ ئے پت (دو سالگ، دو ماھگ) دُزاپ ءِ شیرآباد ءَ ھمت آباد دمگ ءِ نندوک زانگ بوتگ.

ھال وشّ ئے ھالانی رِد ءَ، اے بلوچ 19 دی ماہ ءِ بیگاہ ءَ، مشهد ءِ امامتـ استکلال چارراہ ءُ وتی سیادانی لوگئے نزّیک ءَ پد چہ ایشی ءَ کہ وتی ھمراہ ءِ ھوری ءَ گوں پژو 405 گاڑی ءَ چہ پٹرول پمپ ءَ پہ لوگ ءَ واتر کنگ ءَ بوتگ امنیتی ٹولی ءِ تیرگواری ءِ دپ ءَ کپتگ ءُ چہ پشت ءَ تیر وارتگ۔ آئی ڈریور ئے جاہ ءَ نندوک بوتگ ءُ تیر چہ پُشت ءَ سر ءِ چپّیں نیمگ ءَ لگ اِتگ.

گوشنت اے بلوچ ءَ ماں زھرشانی ءُ مُچّی ءَ ھچ بہرے نہ بوتگ ءُ بس پہ اے ھاترا کہ پادلپاش کنگ ءِ وھدا روڈ ءَ شُتگ، کُشگ بوتگ۔ ٹپیگ بوھگ ءَ پد مشهد ءِ رزوی نادراہجاہ ءَ سرکنگ بوتگ، بلے ٹپّانی باز بوھگ ءِ سوب ءَ دو روچ ءَ پد ماں نادراہجاہ ءَ ساہ داتگ.

اے جهمنند ئے مرگ ءَ پد، امنیتی ادارہ آن ءَ پہ بے ساھیں جون ئے دیگ ءَ چہ لوگئے مردماں 500 ملیون ءِ لوٹ کرتگ۔ ھمیں رِد ءَ آئی ءِ سیاد ءُ ھاندان پہ بے ساھیں جون ئے مانش ءَ، موکل زورگ ءَ مشهد ءِ امنیتی ءُ چیئریں ادارہ ءَ باز ترّ ءُ تاب کرتگ، اے دوران امنیتی ٹولی ءَ آئی ءِ ھاندان سَلاھ جتگ کہ ما وت آئی ءَ مانش ءَ ایئردئین ءُ آئی ءِ پلاک نمبرا شما را سرکنیں بلے ھاندان ءَ اے گپّ نہ منّتگ.

گوشگ لوٹیت کہ دستگیر گرگیج ئے بے ساھیں جون گوں سهدیں ایمنی گامگیج آن ءُ بازیں نزامی ءُ امنیتی ٹولی ءِ ھمراھی ءَ کہ ایوک ءَ آئی ءِ دہ مردم ھور بوتگ اَنت ماں مشهد ئے رزا گلباگ ءَ ایئر دیگ بوتگ۔ امنیتی ٹولی آئی ءِ مانش ایئر دیگ ءِ مراگش ءَ چہ بُنگیج ءَ بہ گر داں آسر بوھگ ءَ ھوار بوتگ اَنت۔ امنیتی ادارہ آن ءَ پہ بے ساھیں جون ئے ماں دُزاپ ءَ مانش ءَ ایئر دیگ ءِ گپّ نہ منّتگ.