رَسانک نیوز/ جمے 19 دی ماہ 1404 ءِ بیگاہ ءَ، بلوچستانی دمگ آں مهلوک ئے زھرشانی ئے ودّگ ءَ ھوار راسک ءِ پیرزآباد (ھسنآباد) دمگ ءَ ھم لہتیں جهمنند ءَ پہ ماشی ءُ مالی جاوران ءَ زھرشانے کرتگ ءُ مُچ بوتگ اَنت، نزامی ٹولی جهمنندانے زھرشانی ئے مُچّی ءَ سربوھگ ءَ پد گوں تیرگواری ءَ پدکِرد داتگ کہ بلوچی ءَ تیر وارتگ ءُ ساہ داتگ.
رَسانک ءَ ساہ داتگیں بلوچئے پجّار «ایوب رسانہ»، 36 سالگ، کینگی ئے چُک، راسک ءَ پیرزآباد دمگ ءِ نندوکیں مردمی زانتگ.
رَسانک ءِ ھال سرکنوکانے رِد ءَ، اے دگہ شہر ءُ دمگانی زھرشانی ءَ ھم وھد، راسک ئے دمگ آں ھم مهلوک ءَ وتی زھرشانی کرتگ۔ ھمیں وھدا راسک ءِ نزامی ٹولی ءَ کہ آیانی بُنجاہ چہ پیرزآباد ءَ ھپت کیلومتر دور اِنت، مهلوکئے مُچّی ئے نیمگ ءَ رھادگ گپتگ ءُ زھرشانی کنوکیں مردمانی سرا تیرگواری کرتگ۔ اے تیرگواری ءَ ایوب ءَ تیر وارتگ ءُ ساہ داتگ.
ھال سرکنوکان ءَ گوشتگ: دیمترا ایوب پہ ماھیگ ءِ کُشگ ءِ کارا دلگوش بوتگ۔ آئی ءِ سرا تیرگواری ءَ پد، نزامی ءُ سپاہ ءِ جهمنندیں کارندگ آنی ٹولی بید چہ ایوب ءِ کمک کنگ ءُ آئی ءِ ھالے گِرَگ ءَ چہ جاہ ءَ در شُتگ اَنت.
گوشگ لوٹیت: انّیگیں زھرشانیاں، دی ماہ ءِ پیسرگیں روچاں گوں تہران ءِ کار ءُ باری مردمان ءُ سوداگرانی زھرشانی ءَ بُنگیج ءُ ماں کمّیں وھد ءَ تیوگیں ملک ءَ تالان بوتگ. بلوچستان ءِ سیاسی گل آنی لوٹ ءُ گوانک ءَ پد، اُدے مهلوک ءُ جهمنندان ءَ ھم ماں اے زھرشانیان ءَ بہر زورتگ۔ زھرشانیانے گیش بوھگ ءَ پد، سرکار ءَ انٹرنیٹ بستگ ءُ یازدہ روچ اِنت کہ جاور ھمیں وڑا برجاہ اَنت، جاورانی ھمیں پیم برجاہ بوھگ ئے سوب ءَ ھال دیر ءَ سر بنت ءُ دیر ءَ چکّاس ءَ بنت.
اولین نفری باشید که دیدگاه مینویسد