رَسانک نیوز/ بیگاھی 22 دی ماہ 1404 ءَ، یکی چہ سپاہ ئے چیئریں ادارہ ئے جهمنندین ءُ سپاہ ئے کُدس ئے بُنجاہ ءَ گوں جُڑتگیں کمانڈر وتی دو گاٹ ءِ ھوری ءَ جالک ئے بچہ راھی دمگ ءَ سلاہ بندیں اُرشی ءَ کُشگ بوتگ۔ اے اُرش ھماں وھدا پیش اَتکگ کہ جهمنندیں کمانڈر وتی ھمراہانی ھوری ءَ دمگ ءَ راہ ئے بندگ ءَ دلگوش بوتگ سلاہ بندیں مردمانے اُرش ءِ وھدا آیان ءَ در روگ ئے جُھد کرتگ، بلے اُرش کنوکاں آیانی پدا کپتگ اَنت ءُ گوں تَچکیں تیرگواری ءَ جهمنندیں کمانڈر ءُ آئی ءِ ھمراہ کُشگ بوتگ اَنت۔ اُرش کنوکیں مردمان ءَ جهمنندیں کمانڈر ئے سلاہ ءُ گاڑی گوں وت ءَ بُرتگ اَنت.
کُشگ بوتگیں کمانڈر ئے پجّار «یاسر نوشیروانی»، شستون ئے اسپندک دمگ ءِ نندوکیں مردمی زانگ بوتگ۔ آں دگہ دوئیں مردم آئی ءِ گاٹ ءُ ھمراہ بوتگ اَنت ءُ داں انگت ءَ آیانے پجّار زانگ نہ بوتگ.
اے ھالئے رِد ءَ، کُشگ بوتگیں جهمنندیں کمانڈر سپاہ ئے چیئریں ادارہ ئے ترور ءُ کاروایی کنوکیں ٹیم ئے بہر بوتگ ءُ پہ ایرانی رژیم ئے سیت ءُ نپ ءَ ماں دمگ ءَ ناشر کاریاں دلگوش بوتگ. دیمترا ماں تاریک 28 تیر ماہ روانیں سال ءَ اے کمانڈر گوں ھمراہی یے ھوری ءَ، جالک ئے سیمسراں سلاہ بندیں اُرشی ءَ ٹپیگ بوتگ، بلے چہ مرک ءَ رَکّتگ۔ آں اُرش ءَ آئی ءِ ایئردستیں دہ کارندگ کُشگ بوتگ.
گوشگ لوٹیت اے کاروایی کنوکیں ٹیم چہ لہتیں ایرانی، ھمیں وٹا پاکستانی ءُ اُوگانستانی باشندگان ءُ اُوگانستان ءِ پیسرگیں نزامی کارندگ آں (چارواک) ئے چیئریک آنی نئز آرگ ءَ جوڑ کنگ بوتگ۔ پیسرگیں رپوٹ آنے رِد ءَ، اے ٹیم ءَ پہ مهلوک ئے پادلپاش کنگ، درمُلکی کاروایی ءُ ترور ئے کنگ ءُ بلوچیں جهمنند ءُ جُھدکاریں بلوچانی جنگ ءَ بہر زورتگ.
داں انگت جنوکیں مردمانی سوب ءُ پجّار زانگ نہ بوتگ، ھچ کس ءُ ھچ گلی ءَ داں اے وھدا اُرش ئے زمہ واری ءَ نہ منّتگ.
اولین نفری باشید که دیدگاه مینویسد