رَسانک نیوز/ چارشمبے 17 دی ماہ 1404 ءَ، مگس ءَ چار روچ دیمترا دزگیر کنگ بوتگیں بلوچئے ھالے سرپدئے نیست اِنت ءُ دارگ ئے جاگہی زانگ نہ بوتگ۔ چیئریں ادارہ ئے سادہ پوشیں کارمندان ءَ اے جھمنند یکشمبے روچ ءَ 14 دی ماہ بید سرکاری ھُکم ءَ دزگیر کرتگ۔ اے گپّ ءَ آئی ءِ ھاندان ءُ لوگئے مردم سکّ ءَ دل پریشان کرتگ.
رَسانک ءَ اے بلوچئے پجّار «ھُدامراد البرز نژاد (ابدلزھی)»، موسا ئے چُک ءُ بُندر ءَ مگس ئے نندوکیں مردمی زانتگ.
رَسانک ءِ ھال سرکنوکانی رِد ءَ، ھماں وھدا کہ ھُدامراد وتی سبزی یے دکان بستگ ءُ گوں سنگتان دیم پہ لوگ ءَ روگ ءَ بوتگ، چیئریں ادارہ ئے کارمندان ءَ آئی دزگیر کرتگ۔ لوگئے مردمان ءَ پہ ھالے سرپدئے پیسرا مگس ئے امنیتی ادارہ آں شُتگ اَنت ءُ ایشی ءَ پد شستون ئے امنیتی ادارہ آں تر ءُ تاب اِش کرتگ بلے آیاں ھچ پیمیں پسّوئے نہ داتگ.
ھال سرکنوکان ءَ گوشتگ: شستون ئے چیئریں ادارہ ئے زمہ واران ءَ گوں ھاندان ءُ لوگئے مردمان ءَ گوشتگ: ھُدامراد پہ دُزاپ ءَ شور دیگ بوتگ، بلے شما پہ آئی ءِ رندگیری ءَ مرو اِیت پرچی ءَ کہ اُداں کسی شمئے پسّو ءَ نہ دنت.
داں انگت ءَ اے بلوچئے سرا بستگیں الزام ءُ تهمت زانگ نہ بوتگ اَنت ءُ اے دوراں آئی ءَ گوں لوگ ءَ ھبر کنگ ءُ وکیل ئے دارگ ءِ ھکّ دیگ نہ بوتگ.
اولین نفری باشید که دیدگاه مینویسد