رَسانک نیوز/ سئے شمبے 9 دی ماہ 1404 ءَ، گوں سماجی جُھدکار آن ءُ دمگئے با بہروسہ ایں مردمانی، چُش کہ رزا بلوچ ءُ مولوی ابدلازیز نارویی ءِ مدامی جھد ءُ رندگیری ءَ ماں تاریک 4 دی ماہ ءَ شہرک گاوداران دمگ ءَ ٹیلئے منڈی ئے سرا زابلی گونڈا ءُ بدماش ٹولہ ئے اُرش ءُ جنجال ئے بُن گپّ ماں مکّی مسیت ءَ سِندگ ءُ گیشّینگ بوتگ.
رَسانک ءِ ھال سرکنوکانے رِد ءَ، اے دیوان ءَ اُرش کنوکانے سروکیں مردمان ءُ بلوچانے کماش ءُ اسپیت ریشان ءَ بہر زورتگ۔ گوں آیانی میان ءَ پیشیگیں ٹکّر آنے دلگوش بیئگ ءَ کہ آں دوران ءَ ھم لہتیں مردم ٹپیگ بوتگ، دیوان ءَ اے پیئسلہ داتگ کہ نُکس وارتگیں مردمانی تاوان دیگ بہ بنت ءُ ھمیں وڑا ھماں ٹیلکشّ آنے کہ ٹکّر ءَ ھور نہ بوتگ اَنت ءُ بس پہ ایشی ءَ کہ منڈی ءَ بوتگ اَنت، نُکس اِش وارتگ باید اِنت کہ منڈی آنے واھُند آیانے تاوان ءَ پر بہ کننت.
گوشگ لوٹیت کہ اے اُرش ءَ بازیں جھمنندے ٹپیگ ءُ باز دگرا مالی نُکس ءُ تاوان وارتگ، کہ ماں تاریک 6 دی ماہ ءَ پہ شکایست ءَ دُزاپ ءِ کلانتری بیست ءُ یک ءَ شُتگ اَنت بلے اُدے زمہ واران ءَ چہ شکایست ءِ لکّگ ءَ پھریز کرتگ ءُ گوشتگ: پہ شکایست ءَ باید اِنت سجهیں نُکس بوتگیں مال ءُ گاڑی آں کلانتری ءَ بیار اِیت، یاں کہ برو اِیت چیئریں ادارہ ءَ کہ شمئے شکایست ءَ رپوٹ بہ کنت۔ جھمنندان ءَ اے گپّ کلانتری ئے بُنگیجی زمہ واریانی ھلاپ زانتگ.
گوشگ لوٹیت: اُرش ءِ روچ ءَ دہ آنے گونڈا ءُ بدماش گوں زھم، کارچ، تبر زین، لٹ ءُ دگہ سلاہ آنے کارمرز کنگ ءَ ٹیلکشّ آنے منڈی ءَ سرا کپتگ اَنت۔ آیان ءَ ٹیلکشّ لٹ ءُ شاپ کرتگ ءُ مشک دِرتگ اَنت ءُ آیانی گاڑی ءُ مال نُکس داتگ ءُ یاں کہ برتگ اَنت۔ اے اُرش ءَ کم چہ کمترا بیست بُچکہ ٹیل ڈگار ءَ ریچگ بوتگ ءُ بید چہ ٹیلکشّ آں لہتیں جھمنند ھم ٹپیگ بوتگ.
اولین نفری باشید که دیدگاه مینویسد