رَسانک نیوز/ سئے شمبے 9 دی ماہ 1404 ءِ بانگواہ ءَ، سمنان ئے بندیگجاہ ءَ بلوچی بندیگی کہ دیمترا پہ مواد ءِ چِست ءُ ایئر آں دزگیر بوتگ ءُ چہ سمنان ئے انکلاب آمیدگِس ءَ پاھو ئے ھکمی وارتگ، پاھو دیگ بوتگ۔ اے بلوچیں بندیگ ھماں وھدا پاھو دیگ بوتگ کہ آئی ءِ پروندہ ئے دیمروی گوں مزنیں شکّ ءُ گُمان ءَ ھوار بوتگ ءُ ھمیں وڑا دیمترا آئی ھِلاپ سبوت آنے نئز آرگ ءُ سرجم کنگ ھم ڈنّ چہ اِنساپ ءَ گوشگ بوتگ.
اے بلوچیں بندیگے پجّار «منسور ریگی (چاکرزھی)»، 38 سالگ، نیکمهمد ئے چُک، آروس کرتگ ءُ چار زھگئے پت ءُ بُندر ءَ دُزاپ ءِ مردم زانگ بوتگ.
اے ھالئے رِد ءَ، آئی ماں ھُرداد ماہ 1403 ءَ چہ دُزاپ ءَ دزگیر ءُ چُنت روچ ءَ پد سمنان ئے بندیگجاہ ءَ دیم دیگ بوتگ۔ دزگیری ئے وھدا ھچ وڑیں موادی چہ منسور ءَ دست نہ کپتگ ءُ آئی ءِ سرا بستگیں الزام ءُ پروندہ گوں دگہ پروندھی کہ آں پروندہ ئے مواد چہ دگہ مردمی ءَ ماں سمنان ءَ دست کپتگ اَنت جوڑینگ بوتگ۔ گوں پروندہ ئے دیمروی ءَ آں دگہ دزگیر بوتگیں مردمانے منّتگیں گپّ ءُ ھبر آں پہ منسور ئے ھِلاپ سبوت پیش کنگ بوتگ اَنت۔ چہ ھمیں دزگیر بوتگیں مردماں دو نپر ءَ پہ منسور ئے ھلاپ گواہ اِش کرتگ. گوشگ بیت کِساس پنچ ماہ دیمترا آیاں ھم پاھو دیگ بوتگ اَنت.
گوشنت کہ منسور ئے اوّلیں ھُکم چہ پاھو ءَ یک درجگی کم بوتگ۔ بلے داں ھم آئی شمبے روچ 6 دی ماہ 1404 ءَ، پہ ایوکیں واڈ ءَ شور دیگ بوتگ۔ منسور ءَ یک شمبے روچ ءَ 7 دی ماہ ءَ گوں وتی لوگئے مردماں گُڑسریں گِندوک کرتگ ءُ زی بانگواہ ءَ پاھو دیگ بوتگ، اے کاروایی ءَ پہ بلوچ بندیگانی پروندہ آنے ڈنّ چہ اِنساپ ءَ دیمروی، بید چہ گناہ ئے سبوت کنگ یاں کہ دپّ وت منّگ ءَ، آیاں پہ نااِنساپی ءَ ھُکم ئے دیگ ءِ بابت ءَ دل پریشانے گیش کرتگ.
اولین نفری باشید که دیدگاه مینویسد