رَسانک نیوز/ دوشمبے روچ 8 دی ماہ 1404 ءَ، کسرکند ءَ بیست روچ دیمترا بیگواہ بوتگیں بلوچئے داں انگت ءَ ھالے سرپدئے نیست اِنت۔ آئی ءِ باراوا پکّائیں ھالے دست نہ کپگ ءَ ھاندان ءُ لوگئے مردم گیشتر دل پریشان کرتگ اَنت ءُ آئی ءِ شوہاز کنگ ئے اُمیت آسر بوھگ اَنت.
اے بیگواہ بوتگیں جھمنند (اھسان اللہ ھوتی)، ابدلستّار ئے چُک، کسرکند ءِ بلوردان دمگ ئے جھمنند اِنت، کہ 18 آزر ماہ ءَ چہ لوگ ءَ ڈنّ ءُ داں انگت ءَ واتر نہ بوتگ۔ آئی ءِ ھاندان ءَ چہ زمہ واریں ادارہ آنے زانتکار آن ءَ چُنت رندا لوٹتگ پہ اھسان ئے شوہاز کنگ ءَ جُھد ءُ گامگیجی بکننت.
اے جھمنند ئے نزّیکیں مردمان ءَ گوں رَسانک ءَ گوشتگ: چُنت بار کسرکند ءِ پرمانداری ءَ شُتگ اَنت ءُ پہ اھسان ئے شوہاز کنگ ءَ چہ نوکیں سہولیات ءَ سوب مند بوھگ ئے درھاست کرتگ. آیان ءَ لوٹتگ پرمانداری پہ اھسان ئے شوہاز کنگ ءَ ھلال اھمر ئے ھاسیں دورگِند آن ءُ بال کنوکیں ھالی شات ءُ بالی گراب آں کارمرز بہ کنت۔ ھاندان ءَ گوشتگ: ماں کوھستگ ءَ کہ روگ ءُ آھگ سهد اِنت گوں اے سہولیات ئے کارمرز کنگ ءَ شوہاز ئے کاروایی شَرّتر دیمروی کنت۔ اے درھاست ءَ پد، ادارہ ئے چُنت کارمند گوں کمّیں سہولیاتی ءَ آئی ءِ شوہاز ئے بے سوبیں جُھد کرتگ.
ھال سرکنوکان ءَ گوشتگ: اے دوران ءَ دمگ ئے بکشدار ءَ گوں اھسان ئے لوگئے مردمان ءَ پہ شوہاز ئے کار ءَ گیشتریں کمک ءُ ھمکاری کرتگ۔ بکشدار ءَ چُنت ماشین ءُ کارمند ھمیں وڑا لہتیں چہ ھلال اھمر ئے کارمنداں پہ آیانی ھزمت ءَ گِستا کرتگ ءُ پرماتگ.
اھسان ئے لوگئے مردمان ءَ گوشتگ: آئی ءَ مارَگ ءُ وسواس ئے زھنی نادراہی اَست ءُ بیت کنت لہتیں براں پہ شرّی ءَ پیئسلہ مہ کنت ءُ یاں کہ گوں سماج ءَ مہ جُڑ اِیت، بلے بے آزاریں مردی ءُ مهلوک ئے ھمدردی ئے ھکّ دار اِنت۔ لوگئے مردمان ءَ گوشتگ: چہ مهلوک ءُ مردماں دسبندی اِنت کہ گوں اھسان ءِ دچار ورگ ءَ اَچانکی ءَ دپ مہ کپنت ءُ بُرزیں توار ءَ ھبر مہ کننت۔ بلکیں پہ آرامی ءَ گوں آئی ھبر بکننت ءُ آئی ءِ جاگہے بابت ءَ لوگئے مردمان ءَ سرپدی بہ دیئنت.
ھاندان ءَ چہ مهلوک ءَ لوٹتگ ھر کس ءَ اے درگت ءَ ھالی دست کپت یاں کہ ھالے سرپد اِنت، ھالاں اے نمبر آن ءَ سر بہ کنت
09155450648
09159893872
09157480775
ھاندان ءَ گوشتگ اُمیت اِنت گوں مهلوک ءُ جھمنندانے کمک ءُ ھمکاری ءَ ھر چی زیتّرا اھسان شوہاز بہ بیت یاں کہ ھالے چہ آئی ءَ دست کپیت.
Be the first to comment