دُزاپ ءِ کلانتری بیست ءُ یک ءَ، گُنڈا ءُ بدماش آنے شہرک گاوداران دمگ ءِ سرا اُرش ءَ پد، جھمنندانی شکایست ءُ رپوٹ ءِ لکّگ ءَ پھریز کرتگ

رَسانک نیوز/ شمبے 6 دی ماہ 1404 ءَ، پد چہ سلاہ بندین ءُ پیسرا ٹاھینتگیں زابلی بدماش ٹولہ ئے بلوچانے شہرک گاوداران ءَ ٹیل ئے منڈی سرا اُرش ءَ کہ ماں 4 دی ماہ ءِ بیگاہ ءَ پیش اَتکگ، لہتیں چہ ٹپیگ بوتگین ءُ نُکسان باریں جھمننداں کہ اے اُرش ءَ نُکس اِش وارتگ پہ شکایست ءُ رپوٹ ئے کنگ ءَ دُزاپ ءِ کلانتری بیست ءُ یک ءَ شُتگ اَنت، بلے کلانتری ءِ زمہ واران ءَ اے درگت ءَ چہ رپوٹ ءُ رندگیری ئے کنگ ءَ پھریز کرتگ.

رَسانک ءِ ھال سرکنوکانے رِد ءَ، کلانتری ٹولہ ءَ نہ تھنا پہ اے ویل ئے پول ءُ تار ءَ نہ شُتگ اَنت، بلکیں بوتگیں تاوان آنے کچ ءُ کیاس ءُ رپوٹ ئے لکّگ ءَ ھم پھریزاِش کرتگ۔ آیاں شکایست کنوکیں مردمش گوشتگ اَنت بایدیں سجهیں گاڑی ءُ مال آنے کہ نُکس بوتگ اَنت کلانتری ءَ بیار اَنت ءُ یاں کہ پہ شکایست ءِ لِکّگ ءَ اِینگ ءَ چیئریں ادارہ ءَ برو اَنت۔ جھمنندانے رِد ءَ، اے بُن گپّ کلانتری ئے بُنگیجی زمہ واریانی ھِلاپ اِنت.

شکایست کنوکیں مردمان ءَ گوشتگ: کلانتری ءِ لہتیں کارمندان ءَ پہ زور ءُ تُرندی ءَ گوں آیاں پیش اَتکگ اَنت ءُ گُڑسرا ھم آیانے شکایست ئے رپوٹ اِش نہ کرتگ. بلے ھکیکت ءَ اے اُرش ءَ دہ آنے بدماشیں مردم گوں گرمیں سلاہ، تبر زین، زھم، کارچ ءُ لٹ ئے کارمرز کنگ ءَ ٹیلکشّ آنے منڈی ءِ سرا اُرش ءَ پد ٹیلکشّ آں لٹ ءُ شاپ ءُ ٹپیگ کرتگ۔ بدماش آن ءَ مشک دِرتگ ءُ بیست پُچکہ ٹیل زمین ءَ رِیتکگ ءُ مهلوک ئے گاڑی ءُ مال آں بازیں نُکس ءُ تاوانے داتگ.

کلانتری بیست ءُ یک ئے بدماش آنے ھِلاپ رپوٹ لکّگ ءَ پھریز کنگ ءُ اے ویل آن ءَ بہر زوروکیں مردمانے گوں امنیتی ادارہ آں جُڑگ ئے ھال آن ءَ یک گَشتی پدا درا کرتگ کہ سرکار ءَ پہ جھمنندان ءُ ٹیلکشّ آنے ھمایت ءَ ھچ ارادگے نیست ءُ جھمنندانے سرا زور ءُ ھژم ئے کارمرز کنگ ءَ، اَبرمی پیش اَتکی یے رنگ ءِ دیگ ءَ مان بستگ۔ اے جاوراں مهلوک ءِ میان ءَ ناامنی ءِ مارشت ءَ گیش کننت بلکیں مردمانی بے بہروسہ ای ءَ سرکار ءُ امنیتی ادارہ آنی سرا جُہلتر کنت.