بندراَبّاس ءَ سلاہ بندیں دُزّان ءَ بلوچے کُشتگ، آئی ءِ بے ساھیں جون بیست ءُ پنچ روچ ءَ پد دُزاپ ءَ سر کنگ بوتگ

رَسانک نیوز/ یکشمبے 7 دی ماہ 1404 ءَ، بلوچی یے بے ساھیں جون کہ ماں تاریک 12 آزر ماہ ءَ بندراَبّاس ءَ سلاہ بندیں دُزّانی تیرگواری ءَ دپ کپتگ ءُ ساھی داتگ، بیست ءُ پنچ روچ ءَ پد دُزاپ ءَ سرکنگ بوتگ۔ اے مردم پہ کار ئے سپری ءَ بِزاں کہ سُہر ئے دئے گِرّ ءُ سودا ءَ بندرابّاس ءَ شُتگ ءُ ماں اے ویل ءَ تیرے وارتگ ءُ کُشگ بوتگ۔ آئی ءِ بے ساھیں جون سرد ھانگ ئے دیما یلاک دیگ بوتگ.

رَسانک ءَ اے بلوچئے پجّار «آزم بلوچزھی»، 43 سالگ، واھش ئے چُک ءُ دو زھگئے پت (یک جَنکُکی، یک بچلوکی) زانتگ.

رَسانک ئے ھال سرکنوکان ءَ گوشتگ: آزم ءَ دُزاپ ءِ ھاپز دمگ ءَ دُکانی بوتگ ءُ آئی ءِ بے ساھیں جون بندراَبّاس ءَ سرد ھانگی یے دیم ءَ یلاک دیگ بوتگ۔ آئی ءِ مرگ ءِ ھال، ھاندان ءَ پہ سرکاری وڑا سر نہ بوتگ۔ ویل ءَ مدّتی پد یک جھمنندی ءَ آئی ءِ بے ساھیں جون ئے اَکس ءُ بُت ماں سوشل میڈیا ءَ شِنگ کرتگ ءُ پجّاروک آن ءَ، لوگئے مردم ھال داتگ اَنت.

ھال سرکنوکان ءَ گوشتگ: ایشی ءَ پد، آئی ءِ سیاد ءُ لوگئے مردم پہ سر ھالئے رندگیری ءَ بندراَبّاس ءَ شُتگ اَنت ءُ بے ساھیں جون ویلئے بیست ءُ پنچ روچ ءَ پد دُزاپ ءَ ھماں وھدا سر کنگ بوتگ کہ اے کوش ئے وڑ ءُ پیم، بے ساھیں جون ئے یلاک دیگ، ڈاکٹر آنے پہ آئی ءِ پجّار ئے گوشگ ءُ جون ءِ دست ءَ دیگ ءَ دیئر کنگ، بازیں شک ءُ گُمانی چِست کرتگ۔ اے بُن گپّ ءَ جھمنندانے ایمنی ئے بابت ءَ دل پریشانیاں گیش ءُ زمہ وارانے بے پرواھی ءَ پہ جھمنندانے ساہ ءُ جان ءَ ھاسکار ماں کوش ءُ سلاہ بندیں دُزّی آن ءَ درا کرتگ.