دُزاپ ءِ شہرک گاوداران دمگ ءَ گونڈا ءُ بدماش آنے ٹولی یے ٹیلکشّ آنے منڈی ئے سرا اُرش

رَسانک نیوز/ 4 دی ماہ 1404 ءَ، دُزاپ ءِ شہرک گاوداران دمگ ءَ کِساس 20 کسّ چہ زابلی گونڈا ءُ بدماش آن ءَ، بلوچے ٹیلکشّ آنے منڈی ئے سرا اُرش ءَ گوں، ٹیلکشّ لٹ ءُ شاپ کرتگ اَنت ءُ مزنیں تاوان اِش داتگ اَنت. آیاں پہ بیم ءِ دیگ ءَ تیرگواری کرتگ ءُ گاڑیانی نُکس دیگ ءَ ھور ٹیلئے مشک دِرتگ اَنت ءُ ٹیلش ریتکگ اَنت.

رَسانک ءِ ھال سرکنوکان ءَ گوشتگ: اے اُرش ءَ ٹیلکشّ آنے ھوری ءَ لہتیں چہ دمگ ءِ جھمننداں ھم زدگ ءُ ٹپیگ بوتگ۔ گونڈا ءُ بدماشانے ٹولی بید چہ ھبر ءُ ھال ءَ، منڈی ءَ تہا بوتگ اَنت ءُ گوں تبر زین، کُردم، کارچ، کِلپ ، زھم ءُ گرمیں سلاہ ءَ ٹیلکشّ آنے سرا اُرش کرتگ۔ داں اِداں کہ تیرگواریش ھم کرتگ.

ھال سرکنوکان ءَ گوشتگ: چہ اُرش ءِ زورا دمگئے ماھول پہ مدّتے ءَ ناآرام بوتگ ءُ ٹیلکشّ پہ وتی جان ءِ رَکّینگ ءَ ناچار بوتگ اَنت چہ جاہ ءَ برو اَنت.

گوشگ لوٹیت گیشتر اے مردماں گوں امنیتی ادارہ آں جُڑتگ اَنت ءُ دیمترا ھم ھمیں پیمیں چہ پیش ءَ ٹاھینتگیں ویل آن ءَ بہراِش زورتگ۔ دُزاپ ءِ ھونیں جمے آن ءَ ھمیں جَتھ آنے کارندگان ءَ، مردمانی زھرشانی ئے دیم زور ئے سرا دارگئے جُھد کرتگ۔ اے جَتھ ءُ ٹولہ تَچک ءَ چہ امنیتی ادارہ آن ءَ پرمان زور اَنت، آیاں گیشتر چہ دگہ شہر آں چُش کہ زابل ءُ سوبہ ئے بُرزیں دمگ آں، دُزاپ ءَ آرگ بنت داں کہ اے وڑیں ٹاھینتگیں ویلانے تہا بہر بزور اَنت.