چھبار ءَ بلوچے چُکّی ئے آوار جنگ ءَ، ھاندان آنے دل پریشانے چہ انّیگیں بدامنی آں گیش کرتگ

رَسانک نیوز/ 3 دی ماہ 1404 ءَ، چھبار ءَ بے پجّاریں مردمان ءَ گوں چُکّیئے آوار جنگ ءَ، شہر ءَ نندوکیں ھاندان آنے میان ءَ ترس ءُ دل پریشانی ئے چولی چِست کرتگ، اے ویل ءَ یک برے پدا درا کرتگ کہ شہر ءَ چکّ آن ءَ ایمنی نیست اِنت ءُ ھمیں وڑا امنیتی ادارہ آں پہ اے ویلانی دیمئے دارگ ءَ ناکام اَنت۔ مروچی باندات ایمنی ئے نہ بوھگ جھمنندانے ٹوھتریں جنجال اِنت۔ اے چُک چہ نندوکین ءُ آبادیں دمگی ءَ آوار جنگ بوتگ، سهد ئے وھدا آئی ءَ پہ وتی رَکّینگ ءَ چہ دمگئے مردمان ءَ کمک لوٹتگ بلے پدا ھم بے پجّاریں مردمان ءَ پہ آئی ءِ آوار جنگ ءَ سوبین بوتگ اَنت.

رَسانک ءَ اے بلوچی چُکّ ئے پجّار «اھمد ھاشمزھی»، اَلی ئے چُک، چھبار ءِ جھمنند زانتگ.

رَسانک ءِ ھال سرکنوکانی رِد ءَ، اھمد وتی جاڑیں برات ءِ ھوری ءَ مهمدی مسیت ءِ پدئیں ڈکّ ءَ روگ ءَ بوتگ کہ بے پجّاریں مردمان ءَ آئی ءِ سرا اُرش کرتگ ءُ پہ زورا آوار جتگ۔ آوار جنگ ءِ وھدا آئی ءَ کوکار کرتگ ءُ چہ مهلوک ءَ پہ وتی رکّینگ ءَ کمک‌ لوٹتگ، دمگ ءَ اُوشتوکیں مردمی ءَ پہ آئی ءِ رکّینگ ءَ جُھد کرتگ بلے آوار جنوکان ءَ آئی ءِ دیم داشتگ ءُ اے چُکّش آوار جتگ.

اھمد ئے ھاندان ءَ چہ مهلوک ءَ درھاست کرتگ ھرکس ءَ اے درگت ءَ ھالی دست کپت ھالاں اے نمبر آں سر بکنت
09157320366
09155456991
09152745113

اے ویل ھماں وھدا پیش اَتکگ کہ دیمترا ھم شہر ءِ نندوکیں ھاندان آن ءَ بدامنی ئے گیش بوھگ ءَ ھاسکار پہ چُکّانے بابت ءَ مار اِتگ ءُ اے باراوا رپوٹ شِنگ بوتگ۔ ھمیں وڑا بلوچے چُکّے کہ نامی مھمد ھالکی بوتگ ماں تاریک 20 آزر ءَ آوار جنگ ءُ دو روچ ءَ پد آئی ءِ بے ساھیں جون چہ شہر ئے کش ءُ کِرّا دست کپتگ۔ اے ویلانے برجاہ بوھگ ءُ پہ آیانی دیم دارگ ءَ ھچ پیمیں گامگیجی زورگ نہ بوھگ ءَ جھمنندانے دل پریشانی گیش کرتگ۔ ھمیں تَچکی ءَ امنیتی ادارہ آنے کارکردگی ءَ اے وڑا مارینتگ کہ چھبار ءِ شہر پہ چُکانے جان ئے ایمنی ءَ وت سر یلاک دیگ بوتگ.