رَسانک نیوز/ سُہبی 30 آزر ماہ 1404 ءَ، ایران ئے نزامی ءُ سادہ پوشیں ٹولی ءِ دہ آنے کارندگ ءُ نزامی گاڑیان ءَ گوں جنگی ساز ءُ سامان ءُ پورا تیاری ءَ دلگان ءِ چاہشور ئے راہ ءَ جیرآباد دمگ ئے چار نیمگ ءَ انگیر ءَ پد، پہ بلوچی ئے دزگیر کنگ ءَ کاروایی کرتگ۔ بلے چُنت ساھت پد چہ سلاہ بندیں ٹکّر ءَ نزامی ٹولی ءَ ھچ نتیجگی دست نہ کپتگ ءُ بے سوب بوتگ.
رَسانک ئے ھال سرکنوکانے رِد ءَ، اے کاروایی ئے مراد ءُ مول «ایرج بامری»، نامیں بلوچیئے دزگیر کنگ بوتگ۔ ایرج بامری ءُ آئی ءِ ھمراہان ءَ کہ اے انگیر ئے دپ ءَ کپتگ اَنت، گوں ٹکّر ئے بُنگیج بوھگ ءَ وتی جنگی ہیل ءُ زانت ءَ کارمرز کرتگ ءُ انگیر ئے تَوک ءِ پُروشگ ءُ چہ دمگ ءَ در روگ ءَ سوبین بوتگ اَنت.
ھال سرکنوکان ءَ گوشتگ: انگیر ئے وھدا نزامی ٹولی ءَ گوں گرانیں سلاہ ءُ وتی جنگی واک ئے کارمرز کنگ ءَ پد ھم پہ اے بلوچئے دزگیر کنگ ءَ سوبین نہ بوتگ۔ اے سلاہ بندیں ٹکّر چُنت ساھت وھد زورتگ ءُ اے دوران ءَ نزامیان ءَ تیربار ءُ کنّاسہ ھم کارمرز کرتگ، ایشی ءَ پد ھم وتی کاروایی ءَ ناکام بوتگ اَنت.
داں انگت، اے ٹکّر ءَ بوتگیں جانی ءُ مالی تاوان آنے باراوا گیشیں ھالی دست نہ کپتگ، ٹکّر ءَ سی ءُ شش ساھت ءَ بُرز گوستگ بلے چہ ناکامی ئے سوب ءَ امنیتی سروکان ءَ اے درگت ءَ ھچ درشانے نہ کرتگ.
Be the first to comment