واش ءَ میرکازھی ءُ شهنوازی کبیلہ آنے میان ءَ انّیگیں جیڑہ آن ءَ پد، رازی نامہ ءُ سلاھ کاری بوتگ

رَسانک نیوز/ 29 آزر ماہ 1404 ءَ، واش ءَ گوں دینی زانتکاران، اسپیت ریش ءُ دمگئے بابہروسہ ایں مردمانی جُھد ءُ میانجی گری ءَ میرکازھی ءُ شهنوازی کبیلہ آنے میان ءَ پد چہ مدّتے جیڑہ ءُ جنجال ءَ رازی نامہ ءُ سلاھ کاری ئے دیوان برجم دارگ بوتگ. اے دیوان گوں دمگئے مزنیں مردمانی رَندگیری ءُ پہ رَدیں پگر آنی شَرّ کنگ ءُ سماجی جنجال آنی دیم دارگ ء‍َ برجم ءُ گوں دوئیں کبیلہ آنے وشّان بوھگ ءُ رازی نامہ آسر بوتگ.

پہرہ ءَ، ایران نادراہجاہ ءِ نزُیک ءَ ماں تاریک 9 آزر ماہ ءَ آیانے گاڑیان ءَ ٹوکر وارتگ ءُ دو بلوچ ءَ ساہ داتگ۔ ایش ءَ پد دوئیں نیمگئے ھاندان ءُ کُٹھمدان آنے میان ءَ گاڑیانے ٹوکر ورگ ئے باراوا شکّ ءُ گمان چِست بوتگ کہ اے جیڑہ آنے بُن ءُ ریشّگ زانگ بیت۔ دیوان ءَ دوئیں نیمگ ئے مردمان ءَ وتی سوچ ءُ پگر درشان کرتگ اَنت ءُ گوں ھبر ءُ ھال ءَ گوستگیں جیڑہ شموشتگ ءُ پہ آیانے آسر کنگ ءَ زور اِش داتگ.

اے دیوان ئے گُڑسرا دوئیں کبیلہ ئے مردمان ءَ یکّا دگر بگل کشّ کرتگ ءُ وتی رازی نامہ ءُ سلاھ ئے جار جَتَگ۔ دیوان ءِ مردمان ءَ اے‌ کار پہ سماج ئے تپاک کنگ ءَ گامگیجی زانتگ ءُ بلوچستان ءَ کماش آنی‌ ارزشت ءَ پہ جیڑہ آنے سِندگ ءَ ساڑائینتگ.