دلگان ئے زھکلوت شہر ءَ چہ رینجرز ئے تیرگواری ءَ دو نوک ورنا ئے ھوری ءَ پنچ بلوچیں کارگر کُشگ ءُ ٹپیگ بوتگ

رَسانک نیوز/ چارشمبے 28 آزر ماہ 1404 ءِ سُہب ءَ، زھکلوت ءَ امام جواد باسک ئے رینجرز ءُ کرمان ئے جازموریان شہر ءِ پنگ دمگ ئے انتزامی پاسگاہ ءِ ٹولی آن ءَ گِر ءُ تاچ ءِ وھدا ماں بلوچستان ءِ سوبہ ءَ تہا بوتگ ءُ دلگان ءِ چاھکیچی دمگ ءَ گاڑی یے کہ بلوچیں کارگر نندوک بوتگ اَنت گوں تَچکیں تیراں بستگ۔ اے تیرگواری ءَ پنچ بلوچیں کارگر ءَ تیر وارتگ ءُ ٹپیگ بوتگ۔ یکی چہ آیانی میان ءَ چُنت ساھت ءَ پد ساہ داتگ.

کُشگ بوتگیں بلوچے کارگر ئے پجّار «امیرھُسین شهدوستی»، 20 سالگ، مهمد ئے چُک، بُندر ءَ دلگان ئے چاھکیچی دمگ ئے نندوک، ھمیں وڑا دوئیں ٹپیگ آنے پجّار «یوسپ بامری شمبے زھی»، 14 سالگ، ایسا ئے چُک، دلگان ئے گز شیئھ ھان ئے نندوک، ءُ ھاپز «مهمد مهمودی»، 18 سالگ، دادمهمد (میرک) ئے چُک، بُندر ءَ دلگان ئے چاھکیچی دمگ ءِ نندوک زانگ بوتگ، داں انگت آں دگہ دوئیں ٹپیگ بوتگیں مردمانے پجّار ءَ نہ گوشتگش.

رَسانک ءِ ھال سرکنوکانے رِد ءَ، پَنگ دمگ ءِ نزّیک ءَ دیم پہ چاھکیچی ءَ نزامی ٹولی پژو پارس گاڑی یے پدا کپتگ ءُ گوں پژو پارس گاڑی ئے گار دیگ ءَ آیاں دگہ پژو پارس گاڑی ئے کہ بلوچ کارگر ءُ آیانی کار واھُند نندوک بوتگ اَنت بید چہ اُوشت ءُ دلگوش دیگ ءَ تَچکیں تیرگواری کرتگ.

ھال سرکنوکان ءَ گوشتگ: اے گاڑی ئے ھر پنچیں نندوک ءَ تیر وارتگ ءُ ٹپیگ بوتگ اَنت، امیرھسین شهدوستی کہ سکّ ءَ ٹپیگ ءُ ھالتی نہ گیگ بوتگ ھماں روچئے بیگاہ ءَ ماں پہرہ ئے ھاتم الانبیاء نادراہجاہ ءَ ساہ داتگ.

چمّ دید گواہان ءَ گوشتگ: نزامی ٹولی تیرگواری ءَ پد بید چہ ایشی ءَ کہ اے ویلئے باراوا ھبر بہ کنت ءُ پُژدر ءَ بہ گوَشنت چہ اُداں شُتگ۔ دمگئے نندوکیں مردمان ءَ گوشتگ: نزامیان ءَ بید چہ سرکار ئے ھُکم ءُ ڈنّ چہ وتی زمہ واری ئے لکہیر ءَ چاھکیچی دمگ ءَ تہا بوتگ اَنت، دمگ ئے نندوکیں مردمانے مُچّی پہ اے تیرگواری ئے سوب ءِ زانگ ءَ بید چہ نزامیانی الکاپیں پسّویی دیگ ءَ آسر بوتگ.