نیمروز ءَ تالبانی تیرگواری ءَ دو بلوچیں بڈّوکی ٹیلکشّ ٹپیگ بوتگ

رَسانک نیوز/ 27 آزر ماہ 1404 ءَ، ولایت نیمروز ئے کنگ ولسوالی ءَ پہ ٹیلئے چار گیلن ئے بڈّ کنگ ءَ تالبان ئے ٹولی ءَ سیمسر ئے نزّیک ءَ بید چہ توار ءُ دلگوش دیگ ءَ دو بلوچیں بڈّوکی ٹیلکشّ آنے سرا تیرگواری کرتگ، آیان ءَ تیر وارتگ ءُ سکّ ٹپیگ بوتگ اَنت ءُ دمگئے مردمان ءَ نادراہجاہ ءَ سر کرتگ اَنت.

رَسانک ءَ اے دوئیں بلوچے بڈّوکی آنے پجّار «مهمد رھشانی» ءُ «ابداللہ رھشانی»، دوئیں نیمروز ءَ کنگ ولسوالی ئے نندوکیں مردم زانتگ.

رَسانک ئے ھال سرکنوکانے رِد ءَ، چہ تالبان ٹولی ءِ تیرگواری ءَ یک ٹیلکشّی ماں پادا ءُ آں دگرا ماں گردن ءَ تیر وارتگ، یکّے ئے ھالت باز نہ گیگ اِنت۔ داں انگت ءَ ھر دو نادراہجاہ ءَ تهت ءِ باھوٹ اَنت ءُ آیانے درمان بوھگ اِنت، اے ھال سرکنوک ءَ زور داتگ کہ تیرگواری بس پہ چار گیلن ٹیلئے ھاترا بوتگ.

اے ھال سرکنوک ءَ دمگئے مردمانے مالی ءُ ماشی جاور آنے بابت ءَ گوشتگ: ھکومت ءَ مهلوک ءِ کٹّ ءُ کارے سجهیں راہ بستگ اَنت ءُ مردم پہ وتی ماشی جنجال آنی شر کنگ ءَ نہ زاننت چی بہ کننت۔ ھمیں وڑا اے ھال سرکنوک ءَ گوَشتگ: کنگ ولسوالی ءَ ھچ الکاپیں کاری بید چہ ٹیل کَشّگئے بڈّوکی کار، مردم ناچار اَنت پہ زندگ بوھگ ءَ اے پُر ھتریں کار ءَ دیم بہ کننت.

اے تیرگواری ھماں وھدا بوتگ کہ انّیگیں ماہ آنے تہا تالبان ءَ بلوچیں بڈّوکی ٹیلکشّ آنے سرا زور ءُ سهدگیری گیش کرتگ ءُ پہ زور ءُ ھژم ءَ گوں بلوچیں ٹیلکشّ آں پیش کئیت، اے تُرندیں پیش اَتک ھماں بَزّگیں جھمنندانے ساہ ءُ مال ءَ بیہار دنت کہ ناچار اَنت پہ شپ ئے نان ءَ اے پُر ھتریں کارا بہ کننت.