بے سجلیں بلوچیں ورنایی دزگیری ءَ پد، چہ سیمسران ءَ پہ اُوگانستان ءَ دیم دیگ بوتگ

رَسانک نیوز/ مروچی پنچشمبے 27 آزر ماہ 1404 ءَ، چہ اُوگانستان ئے بلوچستان ءَ نیمروز ءَ ویڈیو رکاٹی دست کپتگ کہ پیش دار اِیت بے سجلیں بلوچیں ورنایی کہ دُزاپ ءِ نندوک اِنت انتزامی ٹولی ءَ دزگیری ءَ پد چہ سیمسران ءَ دیم پہ اُوگانستان ءَ رھادگ کرتگ۔ اے ورنائیں بلوچ سیمسراں آں دیم سر بوھگ ءَ پد بے ٹلپون ءُ زرّا سکّ ءَ ھیران ءُ سرگردان اِنت.

رَسانک ءَ اے بلوچیں ورنائے پجّار «مهمدامین»، نزیر اھمد ئے چُک، دُزاپ ءِ بابایان دمگئے سیستان روڈ ئے نندوکیں مردمی زانتگ.

رَسانک ءِ ھال سرکنوکان ءَ گوشتگ: اے وھدا اے بلوچیں ورنا ءَ ھچ پیمیں دسرسی گوں لوگئے مردمان ءُ سیادان ءَ نیست اِنت، لوگئے نمبر آئی ءَ چہ بَرّ نہ اَنت پہ ھمیں سوب ءَ لوگ ءَ پئون کُت نہ کنت.

ھمیں تَچکی ءَ رَسانک چہ مهمد امین ئے لوگئے مردمان ءُ سیاد ءُ سنگت آن ءَ لوٹتگ اگاں اے ویڈیو ءَ چارَگ اَنت، پہ وتی چُکّئے ھالئے رندگیری ءَ گوں رَسانک ءَ بہ جُڑ اَنت.

پجّار ئے کاگد ئے نہ بوھگ گپچلی اِنت کہ مزنیں وھدی ءَ سیستان ءُ بلوچستان ءِ سماج ءُ ڈنّ چہ بلوچستان ءَ اے دگہ سوبہ آن ءَ لڈّتگیں بے سجلیں بلوچ آن ءَ گوں بازیں جنجال آن ءَ دیمپان کرتگ۔ بے سجلیں بازیں بلوچی ءَ نزامی ٹولی ھر چُنت وھدا پد، دزگیر ءُ ماں درمُلکیں باشندگانے کیمپ ءَ دارگ ءَ پد چہ مرز ءَ آں دیم رَد کرتگ، اے وڑیں بے زانتیں پیش اَتک آنی برجاہ بوھگ بید چہ بازیں ھاندان ئے زند ئے نا آرام کنگ ءَ پہ سماج ءَ باز گرانیں نتیجگ آں گوں ھمگرنچ بوتگ ءُ زمہ وار آنے بے پرواھی ءَ، اے بُنگپّ ئے سرا درا کنت۔ اے چاگردی جنجال گوں اے وڑیں اُرش ءُ دزگیری آں گیشتر ءُ جُہلتر بیت ءُ دمگئے مردمانے سماجی زند ءُ زھنی ایمنی ئے سرا ھرابیں اَسر ایئر کنت.