پہرہ ئے جُست ءُ پرس کنوکیں ادارہ ءَ دو بلوچے برات لوٹ ءَ پد، دزگیر کرتگ ءُ آیاں زور ءُ آزار داتگ

رَسانک نیوز/ چارشمبے روچ 26 آزر ماہ 1404 ءَ پہرہ ءَ دو بلوچے برات پد چہ ایشی ءَ کہ گاڑیانی پارکینگ ءَ بزاں آیانے کار ئے جاہ ءَ سلاہ بندیں دُزّی یے بوتگ، ماں تاریک 24 آبان ماہ 1404 ءَ، جُست ءُ پرسی ادارہ ءَ آیاں لوٹ کرتگ ءُ زور داتگ کہ اے دُزّی ءَ بہ منّنت ءُ وتی سرا بہ زیراَنت.

رَسانک ءَ اے دوئیں بلوچ آنے پجّار «مهمد نھُست‌پیکر»، 21 سالگ، «اَلی نھُست‌پیکر»، 19 سالگ، ھر دو مهمد اَلی ئے چُک ءُ پہرہ ئے نندوک زانتگ.

رَسانک ءِ ھال سرکنوکانے رِد ءَ، اَلی پہرہ ئے امیرالمؤمنین پارکینگ ءَ کارا بوتگ کہ دیمترا سلاہ بندین ءُ بے پجّاریں مردمان ءَ آئی ءِ سرا اُرش کرتگ ءُ اے اُرش ءَ چُنت گاڑی ءُ یک پٹ پٹی یے دُزّی بوتگ. اُرش کنوکان ءَ پد چہ آئی ءِ لٹ ءُ شاپ ءَ، آوارش جتگ ءُ دُزاپ ءِ نزّیک ءَ ماں گیابانے دور چہ روڈ ءَ یلاکش داتگ.

ھال سرکنوکان ءَ گوشتگ: اے ویل ءَ پد، جُست ءُ پُرس کنوکیں ادارہ ءَ دُزُانے شوہاز کنگ ءِ جاہ ءَ اے دوئیں برات لوٹ ءَ پد دزگیر ءُ لٹ ءُ شاپ ءَ گوں جُھدی کرتگ پہ زور آیاں اے دزّی ءَ وتی سرا بہ زیر اَنت۔ پہرہ ءِ جُست ءُ پُرس کنوکیں ادارہ ءَ آیاں ھمینچو آزار داتگ کہ دوئیں برات بیھوش بوتگ اَنت ءُ گوں نادراہجاہ ءُ ایمرجنسی ئے کارمندانی مان کپگ ءُ کوشست ءَ پدا ھوش ءَ اَتکگ اَنت بلے آزار ءُ لٹ ءُ شاپ ئے ٹپّ آیانے جون ئے سرا جاھ کاینت.

ھال سرکنوکان ءَ گوشتگ: پد چہ ایشی ءَ اے دو برات چہ لوگئے مردمانی دیدار ءَ بے بہر کنگ ءُ پہرہ ئے بندیگجاہ ءَ دارگ بوتگ ءُ اے دوران ءَ جُست ءُ پُرس ئے ادارہ سئے پدا آیاں پہ دُزّی یے منّینگ ءَ برتگ ءُ سکّ لٹ ءُ شاپ کرتگ۔ آیانی ھاندان ءُ لوگئے مردمان ءَ پہ وتی چُکّانی ھالئے سرپدئے دست کپگ ءَ باز تر ءُ تاب کرتگ بلے زمہ واران ءَ الکاپیں پسّویی نہ داتگ ءُ نہ الکاپیں گامگیجی زورگ بوتگ ءُ آیانی بندیگ بوھگ برجاہ اِنت.

گوشگ لوٹیت: دزگیر بوتگیں مردمانی سرا زور ئے کارمرز کنگ، پہ مزنیں وھدے آیانی دارگ بید چہ لوگئے مردمانے گوں ھال اھوال کنگ ءُ وکیل ئے دارگ، آیانی زھنی ءُ جان ئے دُراھی یے سرا ھیالداری نہ کنگ، انسانی ھکّ آنے پادلپاش کنگ ءُ اِنساپ ءِ اُسولانی ھِلاپ زانگ بیت.