رَسانک نیوز/ سئے شمبے 25 آزر ماہ 1404 ءَ، انسارالپُرکان ئے سلاہ بندیں گل ءَ کہ یکے چہ ایرانی رژیم ئے ھِلاپیں گل آں زانگ بیت. نسرتآباد ءُ نرمانشیر ئے راہ ءَ پہرج شہرئے نزامی چیک پوسٹ ءِ سرا اُرش ئے زمہ واری منّتگ ءُ داوا کرتگ اے سلاہ بندیں ٹکّر ءَ کم چہ کمتر ءَ 16 نزامی کُشگ ءُ ٹپیگ بوتگ.
اے سلاہ بندیں گل ءَ وتی جارتاک ءَ گؤشتگ: اے گل ءِ پدائیاں دوشی ساھت 12:10 ءَ پہرج ءِ نزامی چیک پوسٹ ءِ سرا اُرش کرتگ۔ اُرش ءِ بُنگیج بوھگ ءَ گوں 5 نزامی کُشگ بوتگ، نزامی آنے کمک کنوکیں کاروان ئے سربوھگ ءَ پد کہ چُنت نزامی گاڑی ھم آیانی میان ءَ بوتگ ءُ پدائیان ءَ یک ساھت ءَ بُرز گوں آیاں ٹکّر زورتگ۔ اے گل ءَ سلاہ بندیں ٹکّر ءَ کُشگ ءُ ٹپیگ بوتگیں نزامی آنے کچ 16 گوشتگ.
سلاہ بندیں گل ءَ پہرج ءَ نزامی چیک پوسٹ ءِ سرا اُرش ءَ ھواریں پدائیانے کچ ءَ 43 گوشتگ کہ چہ سئے امنیتی ءُ چیئریں، ھزرت ئے انس ءُ ھزرت براء بن مالک ئے کاروایی کنوکیں دستہ ءَ بوتگ اَنت ءُ اے ٹکّرا بہر اِش زورتگ. پدائیاں وتی ایمن ءُ مهکمیں بُنجاہ آنی سربوھگ ءَ سوبین بوتگ اَنت.
سپاہ ئے کُدس ءِ بُنجاہ ءَ گوشتگ: نسرتآباد ءُ نرمانشیر ئے راہ ءَ سلاہ بندیں مردمانی پہرج ءَ تہا بوھگ ءِ نزامی چیک پوسٹ ئے سرا اُرش ءُ ٹکر ءَ سئے نزامی کارمند ءُ یک جھمنندے کُشگ بوتگ. سرکاری میڈیا ءَ یکی چہ کُشگ بوتگیں نزامی کارمند آنے پجّار «سئید ھادی پور»، گوشتگ، داں انگت ءَ آں دگہ کُشگ ءُ ٹپیگ بوتگیں مردمانے پجّار زانگ نہ بوتگ.
رَسانک ئے ھال سرکنوکان ءَ دیمترا گوشتگ: پہرج ءَ سلاہ بندیں مردمان ءُ نزامی ٹولی ئے ٹکّرا لہتیں چہ ٹکّر زیروکیں کارمند آں کُشگ ءُ ٹپیگ بوتگ اَنت.
اے ٹکّر ءَ گوں، بم ءُ دُزاپ ءِ راہ پہ چُنت ساھت ءَ بند کنگ بوتگ ءُ بازیں گاڑی کہ آیانے میان ءَ ٹیل ئے ٹانکری ھم بوتگ تیر اِش لگتگ۔ پنچ آمبولانس ئے گاڑی ھم پہ ٹپیگ ءُ کُشگ بوتگیں کارمند آنے نادراہجاہ ءِ سرکنگ ءَ ٹکّر ئے جاہ ءَ رَھادگ بوتگ اَنت.
Be the first to comment