تہران ءَ بیست ءُ نہ روچ دیمترا بیگواہ بوتگیں بلوچے شوہاز بوتگ، نزامی ٹولی آن ءَ آئی دزگیر کرتگ

رَسانک نیوز/ 19 آزر ماہ 1404 ءَ، بلوچی کہ پہ کارا تہران ءَ شُتگ، رَسانک ءَ ماں 15 آزر ماہ ءَ آئی ءِ بیگواہ بوھگئے ھال شِنگ کرتگ، گوں لوگ ءُ نزّیکیں مردمانے رندگیری ءَ شوہاز بوتگ۔ نزامی ٹولی ءَ آئی دزگیر کرتگ ءُ داشتگ۔ ھمیں وڑا در کانود ءَ گوں لوگ ءَ پہ ھال ءُ اھوال کنگ ءَ نہ ھشتگ اِش.

رَسانک ءَ اے بلوچئے پجّار «مهمد ھُسین شهلی‌بر»، 24 سالگ، جلال ئے چُک، بُندر ءَ جازموریان ءَ زھکلوت شهر ءِ برجک نمداد (اَبّاس آباد) دمگ ئے نندوک زانتگ.

رَسانک ءِ ھال سرکنوکانے رِد ءَ، مهمد ھُسین پہ اوگانستانی ھمکار ئے کمک کنگ ءُ وتی سیم کاٹ ءُ بانک ءِ کاٹ ءِ دیگ ءَ نزامی ٹولی ءَ دزگیر کرتگ.

ھال سرکنوکان ءَ گوشتگ: نزامی ٹولی ءَ گوں (بے کاگدیں دَر مُلکی باشندگانی)، مُلک ءَ ڈنّ کنگئے رھبندانی پیلو ئے وھدا سرپد بوتگ اَنت، درکانون ءَ ملک ءَ نندوکیں دریں باشندگی ءَ مهمد ھُسین نامی مردمیئے سیم کاٹ ءُ بانکئے کاٹ کارمرز کرتگ۔ نزامی ٹولی ءَ بے جُست ءُ پرس ءَ آئی دزگیر کرتگ۔ مهمد ھُسین ءَ ماں آمیدگِس ءَ وتی پجّار ئے کاگد پیش کرتگ اَنت ءُ آمیدگِس ءَ پہ آئی ءَ سئے ماہ بندیگ بوھگئے ھُکم بُرّتگ۔ آمیدگِس ءَ ھماں وھدا اے ھُکم بُرّتگ کہ مهمد ھُسین ءَ بید چہ درمُلکی  ھمکار ئے کمک‌ ءَ دگہ سوبی نہ بوتگ.

دیمترا رَسانک ءِ ھال سرکنوکان ءَ گوشتگ: مهمد ھُسین چہ یک سال ءُ نیم دیمترا تہران ءِ، تہرانپارس دمگ ءَ کابینت جوڑ کنگئے کارا دلگوش بوتگ ءُ ھر چُنت روچ ءَ پد، گوں لوگا ھال اھوالی کرتگ ءُ آئی ءِ گوست ءَ پہ مزنیں وھدے ءَ بے ھالے سرپدئے نہ بوتگ۔ آئی ءِ آھریں پدا بیست آبان ماہ ءَ لوگ ءَ ھال اھوال کرتگ ءُ ایشی ءَ پد گوں لوگئے مردماں گپّے نہ جَتگ۔ لوگئے مردمان ءَ گوشتگ: یک ءُ نیم سال اِنت کہ آئی تہران ءَ کارا دلگوش اِنت بلے داں انگت ءَ وتی کار ءِ جاگہ ئے پئون نمبرے ما را نہ داتگ.

گوشگ لوٹیت: مهمد ھُسین ئے اے کار بید چہ جرمئے کنگ ءُ یاں کہ پہ ردی ءَ کارمرز کنگ ءِ ارادہ ءَ، ایرانئے کانون ءِ رِد ءَ جُرم زانگ نہ بیت۔ بید چہ ایشی ءَ مهمد ھُسین ءَ گوں لوگ ءَ پہ ھال اھوال ءَ موکل نہ دیگ ءُ لوگئے مردمانی گِندوک ءَ نہ ھِلّگ وت در چہ کانود زانگ بیت۔ اے سر ھال ءَ درا کرتگ کہ آئی ءِ پروندہ ئے دیمروی ڈنّ چہ کانود ءِ رھبندان ءَ بوتگ.