چھبار ءَ سی ءُ هپت روچ دیمترا سلاہ بندین ءُ بے پجّاریں مردمانے دست ءَ آوار جنگ بوتگیں بلوچے چُک ئے بیگواھی داں انگت برجاہ اِنت

رَسانک نیوز/ مروچی چارشمبے روچ 19 آزر ماہ 1404 ءَ، چھبار ءَ سی ءُ هپت روچ دیمترا سلاہ بندین ءُ بے پجّاریں مردمانے دست ءَ آوار جَنَگ بوتگیں بلوچے چُکّی داں انگت آئی ءِ ھالئے سرپدئے نیست اِنت۔ زمہ وارانی اے ویل ئے سرا دلگوش نہ بیئگ ءَ لوگئے مردمانی دل پریشانے گیشتر کرتگ.

رَسانک ءَ اے بلوچے چُکّئے پجّار «مزمّل بلوچ»، 10 سالگ، مھسن ئے چُک، بُندر ءَ چھبار ئے نندوک زانتگ.

رَسانک ءِ ھال سرکنوکانے رِد ءَ، دوشمبے 12 آبان ماہ ءَ سُہب ءِ ساھت شش ءُ چلّ ءُ پنچ دکیکت ءَ ماں چھبار ئے روڈی ءَ آئی ءِ پت ئے گاڑی کہ چُکّ ءَ وانگجاہ ءَ سرکنگ ءَ بوتگ داشتگ ءُ بے ھبر ءُ ھال ءَ چُکّ چہ پت ئے گاڑی ءَ ایئر گپتگ ءُ گوں وتا برتگ۔ سلاہ بندیں مردمان ءَ پہ چُکّئے پت ءِ اُوشتئے دیم دارگ ءَ آئی گوں سلاہ ءَ بیہار داتگ.

اے ویل ءَ سی ءُ هپت روچ گؤستگ بلے داں انگت ءَ آوار جنوکان ءَ گوں اے زھگئے مردمان ءَ ھال اھوال نہ کرتگ۔ چُکئے پت ءَ گوشتگ: اگاں کسی ءَ گوں من جیڑہ ءُ جنجالی است من پہ ھبر ءُ جیڑہ آنے سِندگ ءَ تیار اوں، مزمّل ئے لوگئے مردمان ءَ اے نمبر شنگ کرتگ
0930 4430 234
ءُ گؤشتگ: اگاں آوار جنوکیں مردمان ءَ گوں آیان ءَ جیڑہ اے است یاں کہ کسی ءَ اے ویلئے درگت ءَ ھالے سرپدئے دست کپت ھال آں اے نمبرا سر بہ کننت. مزمّل ئے لوگئے مردمان ءَ وتی چُکّئے آوار جَنَگ ءِ ھال اِنساپ ءُ امنیتی زمہ واران ءَ رپوٹ کرتگ، بلے داں انگت ءَ سرکاری ادارہ آن ءَ پہ اے بابت ءَ الکاپیں کاروایی یے بُنگیج نہ کرتگ.