نزامی ٹولی ئے مگس ءِ اسلام‌آباد دمگ ءِ سرا اُرش ءِ وھدا دزگیر بوتگیں بلوچے بیست ءُ چار ساھت ءَ پد، آجو بوتگ

رَسانک نیوز/ 15 آزر ماہ 1404 ءَ، جھمنندانے دو ٹولی ئے میان ءَ اَڑ ءُ جیڑے سوب ءَ نزامی ٹولی ءَ مگس ءِ اسلام آباد (ندانی دپ) دمگئے سرا اُرش ءَ گوں بلوچے دزگیر کرتگ، اے بلوچ بیست ءُ چار ساھت ءَ پد زی 16 آزر ماہ ءَ آجو بوتگ.

دزگیر کنگ بوتگیں بلوچئے پجّار «پزل اللہ ھملی»، 26 سالگ، گلام شاہ ئے چُک گوشگ بوتگ.

اے ھالئے رِد ءَ، نزامی ٹولی دمگئے تہا بوھگ ءَ گوں اے بلوچ دزگیر کرتگ، دمگ ءَ نندوکیں مردمان ءَ آئی ءِ بے گناہ بوھگئے سرا زور داتگ ءُ گوشتگ: آئی ھچ وڑیں جنجال ءُ جیڑہ ای ءَ ھور نہ بوتگ۔ آئی ایوک ءَ ٹکّر زوروکیں مردیئے برات اِنت، بلے آئی ءِ جِند اے ٹکّر ءُ جیڑہ ءَ ھچ پیمیں بہری نہ زورتگ.

گؤشگ لوٹیت: نزامی ٹولی گوں دہ آنے گاڑی ءَ‌ اے دمگ ئے سرا پہ چار نَپر ئے دزگیر کنگ ءَ کہ اے ھونیں جیڑہ ئے بُنیں کردار زانگ بنت اُرش کرتگ۔ نزامی ٹولی ئے اُرش، دمگ ءَ جنیں آدم، گُونڈیں چکّانی میان ءَ تُرس ءُ بیم ئے سوب بوتگ.

کُہنیں جیڑہ اے کہ چار مردم چہ یک نیمگی، آں دوران ءَ کُشگ بوتگ، انّیگیں جیڑہ آنے بُن ءُ ریشّگ اِنت۔ جیڑہ ئے دوئیں نیمگئے مردم چہ ھمّلی کبیلہ ئے دو برات رند اَنت، کہ یکّا دگرا گوں نزّیک ءُ سیاد اَنت۔ آیانے کاشت کاری ئے زمین ءُ ڈگار کِرّ پہ کِرّ اَنت ءُ آیانی آپ ھم ھور اِنت ءُ اے بُن گپّ جیڑہ آنے مستریں سبب زانگ بیت.