ابولپزل مسیت ءُ بزمان ئے راہ ءَ، سلاہ بندیں دُزّانی تیرگواری ءَ بلوچے ٹپیگ بوتگ

رَسانک نیوز/ سئے شمبے 11 آزر ماہ 1404 ءِ شپ ءَ، ابولپزل مسیت ءُ بزمان ئے راہ ءَ سهرگان ئے چیک پوسٹ ءَ رند، سلاہ بندیں دُزّانی گاڑیئے سرا تیرگواری ءَ ڈریور ٹپیگ ءُ گاڑی ءَ بازیں نُکسی بوتگ.

رَسانک ءَ اے بلوچئے پجّار «آرش زین‌الدینی »، 20 سالگ، شئی مهمد ئے چُک، بُندر ءَ بنپور ئے نندوکیں مردمی زانتگ.

رَسانک ئے ھال سرکنوکانے رِد ءَ، اے بلوچ گوں وتی گاڑی ءَ ابولپزل مسیت ءُ بزمان ئے راہ ءَ روگ ءَ بوتگ کہ سهرگان چیک پوسٹ ءَ پد، سلاہ بندیں دُزّان ءَ راہ بستگ ءُ اُوشت داتگ۔ پد چہ‌ ایشی ءَ کہ ڈریور ءَ زانتگ، آیاں دُزّ اَنت چہ جاہ ءَ در شُتگ.

ھال سرکنوکان ءَ گوشتگ: ڈریور ئے در روگ ءَ پد، دُزّ آئی ءِ پدا کپتگ ءُ تیرگواریش کرتگ، ڈریور ءَ دست ءَ تیر وارتگ، گاڑی ءَ ھم کِساس دہ تیر لگتگ ءُ بازیں نُکسے بوتگ.

گوشگ لوٹیت: اے تیرگواری ھماں وھدا پیش اَتکگ کہ انّیگیں ماہ آن ءَ بم ءُ پہرہ ئے راہ ءَ اے وڑیں ویل گیش بوتگ اَنت۔ ڈریور ءُ مردمانے شکایست بے پسُو منتگ اَنت، بزمان ءُ پہرہ ئے راہ آن ءَ اے ویلانی گیش بوھگ، چہ زمہ وار آنے جاور آنی سرا دلگوش نہ بیئگ ئے سوب اِنت۔ جاور آنی‌ ھمیں پیم دیمروی ءَ ڈریور آن ءُ جھمنند آنے دل پریشانے ءُ ھر روچیں جنجال گیش کرتگ.