پہرہ ءَ وانندگیں جھمند ئے بیگواہ بوھگ ءَ پد، دو سال اِنت کہ لوگئے مردم آئی ءِ رھچارانت

رَسانک نیوز / مروچی شمبه 8 آزر ماہ 1404 ءَ ، پہرہ ئے دمگ ءَ «ابدلرھمان شهیکی»، نامیں بلوچے کہ ماں تاریک 9 مرداد ماہ 1402 ءَ بے پجّاریں مردمانے دست ءَ آوار جنگ بوتگ، داں انگت ءَ بے ھالے سرپدئے اِنت.

ابدلرھمان شهیکی، الیشاہ ئے چُک، آروس کرتگ ءُ پنچ زھگ ئے پت کہ سئے جنیں چُک ءُ دو مردیں چُکّ اَنت. بیگواہ بوھگ ءَ پد ھاندان ءُ لوگئے مردمان ءَ آئی ءِ شوھاز کنگئے جُھد کرتگ بلے داں انگت سوبیں نہ بوتگ اَنت ءُ تہنا آئی ءِ گاڑی دست کپتگ. مزنیں وھدا پد آوار جنوکان ءَ گوں ابدلرھمان ئے لوگئے مردمان ءَ ھال اھوال کرتگ ءُ بازیں زرّی لوٹتگش کہ چہ آیانے وس ءَ ڈنّ بوتگ.

بیگواہ کنوکانے پئون ءَ پد ھم امنیتی ادارہ آن ءَ پہ اے بلوچئے شوہاز کنگ ءَ گامگیج نہ کرتگ، اے پیم ءَ لوگئے مردمانی دل پریشانے ءُ رھچاریئے درد گیش بوتگ.

رَسانک ءِ ھال سرکنوکان ءَ گوشتگ: اے وانندگیں بلوچ ءَ بیست ءُ دو سال ماں وانگ ءُ زانگ ئے وزارت ءَ ھزمت کرتگ ءُ پد چہ ایشی ءَ سیادی آئی ءَ پئون جتگ، چہ لوگا در اَتکگ ءُ داں مروچی واتر نہ بوتگ. آ مرد ءَ کہ گُڑسریں پئون جتگ ھم چہ آئی ءِ ھال ءَ بے سرپدئے زاھر کرتگ.

ھال سرکنوکان ءَ گوشتگ: اے بلوچئے بیگواہ بوھگ ءَ دو سال ءَ بُرز گوستگ ، بلے امنیتی ادارہ آن ءَ پہ آئی ءِ شوھاز کنگ ءَ ھچ وڑیں گامگیجی نہ کرتگ.