لاشار ءَ سلاہ بندیں ٹکّر ءَ، شش بلوچ کُشگ ءُ ٹپیگ بوتگ

رَسانک نیوز/ سئےشمبے روچ 27 آبان ماہ 1404 ءَ، جھمنندانے دو ٹولی ئے میان ءَ اَڑاند ءِ برجاہ بوھگ ءَ کہ دیمترا ھم چُنت مرک ءِ سوب بوتگ، اے ٹکّر ءَ ھم چار مردم کُشگ ءُ گونڈیں چُکئے ھوری ءَ دو مردم ٹپیگ بوتگ.

کُشگ بوتگیں مردمانی پجّار «مسلم سھویی (سردارزھی)»، «مھمد سھویی (سردارزھی)»، ھر دو برات ءُ دُرمھمد ءِ چُک ءُ بُندر ءَ کتیاب دمگ ءِ نندوک ءُ «مھمد جاوشیری»، ھُدادات ئے چُکّ، بُندر ءَ سول دمگ ءِ نندوک، «امین»، رمشک دمگ ءِ نندوک۔ ٹپیگ بوتگیں دوئیں بلوچانے پجّار «مسلم درزادہ»، 5 سالگ، اسلم ئے چک ءُ آئی ءِ ناکو «ابراھیم درزادہ»، پیرمھمد ئے چُکّ ھر دو لاشار ءِ اھمدآباد دمگ ءِ نندوک زانگ بوتگ اَنت.

رَسانک ءِ ھال سرکنوکانے رِد ءَ، گوں پیسریگیں جیڑہ آنے برجاہ بوھگ ءَ، پیسرا چار مردمان ءَ گونڈیں چُک ءُ آئی ءِ ھمراہ ئے سرا اُرش کرتگ کہ دوئین آں تیر وارتگ ءُ چُکّ ءِ پادا تیر لگتگ ءُ ھالتی نہ گیگ اِنت.

ھال سرکنوکان ءَ گوشتگ: اے تیرگواری ءَ پد، اُرش کنوکیں مردمانی پیادگ ءَ واتر کنگ ءِ وھدا، گونڈیں چُک ءُ آئی ءِ ناکو ئے سیاد ءُ مردماں جنوکانے پدا کپتگ اَنت۔ پد چہ کمّیں ٹکّرا، آیانی میان ءَ چار مردم کُشگ بوتگ.

گوشگ لوٹیت: اے ویل ءُ ٹکّر آن ءَ پد، دمگ ءِ ماھول ناآرام اِنت ھاسکار ھماں دمگ آں کہ اے مردم نندوک اَنت۔ سماجی جُھدکاران ءُ انسانی گل آں گوں جوڑتگیں مردمان ءَ چہ دمگ ءِ کماش ءُ اسپیت ریشان ءَ لوٹتگ پہ جاورانے کنٹرول ءُ گیشتریں ھژم ءُ ھون ریچی ئے دیم دارگ ءَ شرّیں گامگیجی بہ کننت.